Kaihtike Ginra Gasau Htu Masing Hpe N Ninghkap Na Matu Ginra Masha Ni Hpe KIO Ningbaw Kaba Sa Tsun
Manje hte Manwing gyi lapran, Kaihtike ginra hta Gasau htu na matu KIO hkyen nga sai rai nna, Gasau htu ai hpe laja lana n ninghkap sana hku, Nbapa ginra masha ni hpe KIO ningbaw kaba Nban La sa hkrum shaga wa ai lam, ginra masha ni tsun ai re.
“galaw na matu hkyen nga sai. Galoi galaw na gaw a tsawm n chye shi ai” nga nna Nbapa ginra masha langai tsun dan ai re.
Lai wa sai August 12 ya shani, Nba pa ginra, Lana Zupja hta KIO Ningbaw Kaba Nban La sa du nna, ginra mung shawa ni hte sa hkrum wa ai shaloi, gasau htu ai lam hte seng nna, laja lana ninghkap n gun madun ai lam ni n galaw na hku madung sa tsun wa ai lam, tsun dan ai re.
Dai shawa hkrum zup hpawng hta Dingsingpa, Nbapa hte Loije mayan na ginra mung shawa yawng hkying hku sa du shanglawm wa ai lam chye lu ai.
Dai shani na hkrum zup hpawng hta Ningbaw Kaba Nban La gaw Manje ginra hta Gasau htu shaw na shara ni hte seng nna, kata lam atsawm tsun jahpra ai lam n nga ai raitim, ya ten Nbapa, Dingsing pa ni hte lamu ga matut nga ai Kaihtike bum marawn hpe KIO maga Gasau htu shaw na matu kade n na yang bungli hpang sana hku rai sai lam ginra masha ni tsun ai re.
Ya KIO maga Gasau htu shaw na matu bungli hpang hkyen ai shara gaw lai wa sai January shata 29 ya shani hta sha KIA maga gasat zing tawn ai Kaihtike bum marawn hta rai nna dai shara ni gaw Nbapa, Dingsing pa ni hte lamu ga shara matut manoi rai nna, Manwing gyi makau KIA dap ba 11 npu ginra rai nga ai.
Lai wa sai 2022 ning December kaw na Miwa jarit Manje kata Nbapa, Dingsing pa ginra hta gasau htu shaw na masing KIO hkyen wa ai majaw ginra masha ni yawng laja lana n gun madun ninghkap wa ai re.
Dai majaw shata 4 ram na ai hpang 2023 ning April 15 ya shani gaw Manje ginra na Gasau htu shaw ai masing yawng hpe KIO maga dawn kau ya ai re.
Ya ten, Jinghpaw mung ting madang Phone line, Internet line yawng pat da hkrum nna, majan ni matut manoi laja nga ai ten, maga mi hta ginra masha ni ninghkap tawn ai shara hkan gasau htu shaw na matu KIO maga bai hkyen lajang wa ai lam rai nga ai re.
