Jinghpaw Wunpawng Hkalup Hpung Ginjaw KBC, Waimaw ginwang ningbaw Rev.Mading Hkaw Bawm hpe Myen hpyendap hte Pyitutsit hpung ni July 17 ya shani rim woi mat ai lam chye lu ai.
Rev.Mading Hkaw Bawm hpe rim woi mat wa ai lam gaw, July 17 ya shani, Waimaw Wuyan Pyitutsit hpung ni pyitutsit wang hpe backhole hte ga ganaw htu shing grup kau nna shim lam shagreng nga ai video kadun, online ntsa de chyam mat ai hpang, shi hpe sa rim mat wa ai re.
“backhole hte rai ga htu ganaw taw ai sumla Video kadun gayet mara ai ngu rim woi mat wa ai. Wechat, Facebook ntsa de yawng chyam bra mat ai. dai hpe kadai gayet mara ai ngu sa gawn sa gawn rai yang hpung up sara gayet mara ai ngu rim mat wa ai rai nga ai” Waimaw ginra masha langai tsun dan wa ai re.
Sara Mading Hkaw Bawm dum nta hte Wuyan Pyitutsit dap shara gaw pe 100 grupyin daram sha gang ai re.
Pyitutsit hpyendap wang gaduk htu shing grup nga ai Video kadun jahpawt daw maga Facebook, Wechat hkan chyam mat wa ai hpang, shana de daw dum nta kaw nan sa rim woi mat wa ai lam hpe chye lu ai.
Rim hkrum ai Rev. Mading Hkaw Bawm gaw Waimaw ginwang KBC ningbaw rai nna, ya ten hpyen majan a majaw hprawng koi yen hkawm nga ai hpyen yen mung shawa ni hpe gawan gatsan taw nga ai mung rai nga ai re.
Ya na zawn magam gun sara langai mi hpe hpyen ladat hte ntara ai sha rim woi mat ai ntsa , Waimaw ginra masha wa ndai zawn matut tsun dinglun tawn ai re.
“Hpung magam gun ngu ai gaw mu ai, ntara ai hpe gaw gara maga ntsap ai sha gwi gwi tsun ai rai nga ai. raitim hpyen wa gaw shanhte maga ntsap ai , shanhte hpe shiga jaw ai ngu grau nna gaw KBC sara nga yang shanglawt hte matut ai ngu mara tam ding lun ai rai nga ai. Dai majaw tara ai lam galaw tim pa ntara ai hku sha mu ai majaw hkam sha ai”
Waimaw Pyitutsit dap ni gaw lai wa sai ten hta ginra kata magam gun hpung shara ni hpe n tsen n hten ai hte rim woi san jep ai lam ni ding yang galaw nga ai re.
Waimaw ginra hta Myen hpyen dap hte Pyitutsit hpung ni gaw Waimaw Hk.L.Y 58 dap hte Wuyawng Pyitutsit dap shara ni hpe n-gasat hkrum hkra, mare kata bangga gaduk ni tawn nna dap jung shara jahkrat shim lam shagreng da ai lam ni mung nga ai re.
By – Naw Htoi (Hugawng)
