Myitkyina-Putau madaw lam kaba hten taw ai majaw gunrai htaw madaw 80 daram lam pat hkrum taw nga nna, mawdaw lam lawan hkrang hkra graum ya na matu ginra masha ni hpyi shawn nga ai re.
July praw 1 ya shani kaw nna, marang kaba htu ai majaw, Myitkyina, Sumprabum lapran Hpung-Ing Yang hte Tayang Zup mare ni hta, lam nawng nawng gyi ru mat ai nhtoi 20 ya du wa sai re.
Mawdaw lam kaba gaw, Hpung Ing Yang, Njip, N-sawp, Tayang Zup mare ni hta Pe 200 daram du hkra gyi ru taw nga ai majaw, ya ten lam ntsa madaw 80 daram pat hkum nga ai lam, Tayang Zup ginra masha langai KNG shiga dap hpe tsun dan ai re.
“Tayang kaw na Putao du hkra gaw kade daram dang nga kun atsawm rai nchye ai. raitim mung ndai Myitkyina, Putao lam lapran kaw dau taw nga ai rai yang, yawng 80 hte 100 grup yin gaw du na re. hkrun lam hkawm lai wa yu wa ai ni mung yawng dai hku sha tsun nga ma ai.”
Hten taw nga ai shara ni hpe July shata 10 jan ya kaw nna seng ang ai Myen hpyendap hte shanglawt asuya lahkawng maga jahkrup nna, Myitkyina-Tayang Zup madaw lam hkrang hkra galaw hpang nga sai re.
Lam gram lajang ai lam hpang nga sai raitim mung, marang matut htu nga ai majaw tang du na n du na ngu hpe tsun na matu naw yak nga ai zawn, Myitkyina-Putau lam atsawm lai di lu na matu shata kaba naw na na masa nga ai lam, Tayang zup ginra masha langai matut tsun ai re.
“Ya lam hpe gaw mai byin ai daram hku n-na gaw galaw hpang nga ma sai. Myitkyina hkran maga Tayang Zup du hkra gaw masha galaw ai ni galaw, jak hte galaw ai ni galaw rai nga ma ai. Ya ten gaw masha kai mai hkra shawng galaw ra ai rai nga ai. ndai bat lahkawng laman gaw Myitkyina hte Tayang gaw lam hkrang hkra galaw nga tsun nga ma ai.”
Ya ten Myitkyina – Putao lam nta kaw chyat rawng nga ai gunrai htaw madaw la ni gaw lawan lai di lu na matu ladat amyu myu shakut taw nga ai raitim, lam gyiru hten nga ai shara rai law nga ai majaw lung wa mung n mai, yu wa mung n mai mayak hkrum nga ma ai re.
Bai nna Sumprabum ginra kata kaw nga ai mung masha n-kau gaw bungli majaw hkawm sa ra ai rai yang, Tayang Zup lai du hkra jak li jawn nna , Myitkyina hkran maga de yak yak hkak hkak hkawm sa nga ra ai hpe matu chye lu ai re.
Lai wa sai July shata praw de marang kaba htu ai a marang e, Mali hka tung nna Myitkyina – Sumprabum lam ntsa madaw lam gyiru mabyin sha n-rai, dai ginra na mare kahtawng yawng ngu na daram mung hka tsim yam hkrum wa sai re.
Mali hka makau kaw nga ai Tayang Zup , Nsawp, Njip mare ni gaw mali hka kaba wa nna madaw lam ni gyi ru mat ai amajaw dum nta 30 daram mung gyi lam mat ai re.
Dai majaw ya ten dai ginra ni hta hka tsin yam hkrum ngut ai hpang mare shagu ngu na mare gaw gap la na matu garum ning tum ni mung hkrak hkrak ra ga dawn nga ai lam ginra masha ni tsun ai re.
Dai ning 2024 ning July shata praw de Jinghpaw mung kata kaw marang kaba ai a marang muklum shara shagu ngu na hta shawoi shaning ni hta grau n-na laklai ai hku ginra mung masha ni hka hpyen tsin yam hkrum sha nga ai re.
| ReplyForward |
