Kachin National Congress KNC Mying Bang Ai Lam Hpe Myen Hpyendap Ra Lata Poi Commissione Ninghkap Kau Ya
Kachin National Congress KNC Mung Masa Party Mying bang ai lam hpe Myen hpyen dap ra lata poi Comission maga n hkap la ya ai hte ningdang kau ya ai re lam, July praw 9 ya shani na Myen hpyen shi laika hta ndau wa ai re.
“KNC Party mying bang wa ai hta ralata poi tara upade hte htuk manu ai lam n nga ai majaw, ralata poi commission a dawdan minute (12/2024) hte ralata poi tara kanu (ဆ) hte maren ningdang kau ai,” nga July praw 9 ya shani မြန်မာ့အလင်း shi laika hta ndau da ai re.
Mung masa Paty mying bang ai tara kanu masat 25 hte maren Party hku na matut tsap sa mat wa na matu KNC maga mying bang ai hpe, Myen hpyen dap ra lata poi commision kaw na dai hpe hkap jep yu ai hta Party mying bang tara kanu masat 6 hte bung pre ai lam n nga ai, nga nna hkap ningdang kau ya ai hpe mu lu ai re.
Myen hpyen dap ra lata poi commission maga na mung, matut naw ngam ai laga mung masa Party ni hpe masat da ai tara upade hte bung pre ai lam nga, n nga hpe matut jen jep taw nga ai nga tsun da ai re.
Myen hpyen dap daru magam zing kau ai hpang, Myen mung mung masa party yawng hpe shaprai kau ai lam n dau wa nna, Myen hpyen dap ningnan bai gyin shalat da ai ralata poi tara upade hte hkrak ningnan kaw na mying bai bang sa wa ra na re lam lai wa sai shaning ni hta ndau wa ai re.
Jinghpaw Party wuhpung langai rai nga ai Kachin National Congress hpe lai wa sai 1949 ning kaw na hpaw ninghtan wa ai party langai rai nna, asuya ban hte ban Party mying bang nna, ra lata poi shagu hta shang shing jawng lawm taw nga ai Party wuhpung langai mung rai nga ai.
Ya na zawn Myen hpyen dap daru magam zing ai hpe ninghkap ai amyu sha Party law malawng mying bang ai lam n nga ai rai tim, KNC maga na ya na zawn mying bang wa ai hpe Myen hpyen dap kaw na n hkap la ya ai mung rai nga ai.
KNC party gaw lai wa sai 2015 hte 2020 ning ra lata poi ni hta shang shingjawng lawm wa ai hta, shara mi mung dang ai lam n nga wa ai re.
