Hpyen Lagaw Gang Ai Masa hku Shamu Shamawt Pru Wa Ai Myen Hpyen Hpung Hpe KIA Hkap Shingla Gasat
Hpakant ginra hta Myen hpyen dap hpyen shamu shamawt taw nga ai nhtoi masum ya du wa nga sai rai nna, ndai laman shani shagu ngu na Myen hpyen hpung hpe KIA hkap shingla gasat ai lam ni galaw taw nga ai re.
Lai wa sai June 25 ya shani kaw na, Hpakant Byuha dap na Myen hpyen n-gun 50 daram gaw, Seng Tawng mare maga de hpyen shamu shamawt hkawm wa ai hpe KIA dap maga hkap shingla gasat ai hta, Myen hpyen dap maga sum machyi law nna, laknak kaba hte hkrup mara gap shadam bun taw nga ai lam, dai ginra na mung shawa langai KNG shiga dap de tsun dan ai re.
“Ya hte Indawgyi maga de majan baw wa ai, dai shara de na Myen hpyen dap ni hpe anhte maga na ni htim gasat zing madu la wa ai, dai hpe hpyen lagaw gang ai hku na Hpakant maga de hpyen shamu shamawt wa ai ga rai nga ai, dai hpe anhte maga na ni Drone hte anut jaw dat dat di ai kaw tsawm ra masan sa ai, shan hte maga sum machyi law wa ai majaw ndai laman Hpakant Byuha kawng na laknak kaba gap shadam taw ai rai nga ai,” nga tsun dan ai re.
Myen hpyen dap maga na ya na zawn hpyen shamu shamawt hkawm wa ai hpe KIA dap maga na mana maga de hkying 3 chyen daram hta, Seng Tawng Hpungkyi jawng makau Drone hte hkap shingla gasat ai kaw na lahkawng maga gasat gala lam byin wa ai re.
Dai gasat gala byin wa ai hta, Myen hpyen dap maga hkra machyi ai lam ni nga wa nna, KIA dap maga na dap prang ladat hte jahkring htim gasat kau da nna, bai hting nut mat wa ai lam chye lu ai.
KIA dap maga hting nut kau da sai rai tim, Myen hpyen dap maga na gaw, makau grup yin ni de laknak kaba hkrup mara gap shadam bun wa ai re.
Lai wa sai June 26 ya shani Seng Tawng Balik dap rung hta, Myen hpyen balik ni zuphpawng hpawng nga ai hpe KIA dap maga Drone hte sa gap bun ai hta Myen hpyen dap maga n tsa tsang balik du ni asak si sum wa ai nga, KIA hte ni nawn ai ni kaw na tsun da ai re.
Ya ten Myen hpyen dap gaw, Nawnglut Ginwang kata na Myen hpyen dap shara ni hpe KIA hte PDF pawng hpawm dap ni n’gun kaba hte htim gasat zing madu wa ai majaw, hpyen lagaw gang ai masa hku na Hpakant de hpyen shamu shamawt wa ai re nga, ginra masha ni tsun maram da ai re.
Lai wa sai bat hta Nawng Lut ginwang kata na Myen hpyen dap shara 3 hpe htim gasat zing madu kau nna, ya naw ngam ai Lung Tung hte Na Mawn Mare Myen hpyen dap hpe bai htim gasat wa na masa nga ai majaw, dai ginra na mung shawa yawng tinang man ang ai shara de hprawng yen taw nga ai re.
