Nmawk Manbung lawk de gale pru wa ai Myen hpyen hpung ni hpe KIA dap maga dai hpawt manap hkap gap gasat ai hta Myen hpyen hpung ni bai nhtang hprawng shang mat ai nga, shawng lam hpyen shi sawk ni tsun ai re.
June 25 ya jahpawt manap hkying 9 daram hta Nmawk Myen hpyen dap Hk.M.Y 437 na mung shawa hking hte pru wa ai Myen hpyen la marai 10 jan hpe KIA dap maga hkap gasat dat ai majaw, dai Myen hpyen hpung ni dap kata de bai hprawng shang mat wa ai nga, shawng lam hpyen magam gun hte ni nawn ai ni KNG shiga dap de tsun ai re.
“ Dai hpawt Nmawk Manbung lawk de mung shawa hking hte gale pru wa ma ai, mung shawa hking hking nna, sinat gaw bai hpai da re majaw anhte maga na ni hkap gap ai hte dap kata de bai hprawng shang mat ma ai,” nga tsun ai re.
Dai Myen hpyen hpung ni gaw, dap kata hta lu sha yak wa ai majaw, mung shawa hking hte sinat hpai nna, shinggan de pru wa ai hpe KIA dap maga hkap shingla gasat dat ai kaw na aten gadun jahkring mi gap gasat hkat wa ai re lam chye lu ai.
Ya ten Nmawk Myen hpyen dap hpe KIA dap maga, lu sha shakyet da ai shata mi jan du wa nga sai majaw, dap kata hta lu sha yak hkak wa nna, shinggan de lu sha tam hkawm wa ai hpe hkap shingla gasat ai masa re lam shawng lam magam gun nit sun maram da ai re.
Manmaw kaw na Myen hpyen hpung ni Manje Kawng Ja Yang maga de dai hpawt manap hkying 9 daram hta, bai htu shadut sa wa ai majaw KIA dap maga hkap shingla gasat ai kaw na dai na maga de du hkra gap gasat hkat taw nga ai nga shawng lam magam gun ni matut tsun dan wa ai re.
Dai gap gasat hkat nga ai shara de Myen hpyen Jet Fighter nbungli hta 2 lang sa gap bun kau da ai lam matut chye lu ai.
“Kawng Ja Yang maga de mung bai htu shadut sa wa ai majaw, dai ni ting gap gasat hkat ma ai, dai hpawt hkying 10 ram hta mung nbungli hte lahkawng lang sa gap kau da ma ai,” nga matut tsun ai re.
Ya ten Manje Myen hpyen dap de malu masha laknak n lu htaw shalai hkra Kawng Ja yang hta KIA dap maga lam pat da ya ai hpe Myen hpyen dap maga na ya na zawn htim gasat wa ai rai nga ai.
Dai mayan yawng hpe KIA dap lu sha shakyet tawn ai shata mi jan du wa nga sai rai nna, Manmaw de na hpri gang mawdaw hte shim lam la ya nna, malu masha hte laknak machyu pala htaw sa wa ai hpyen hpung ni hpe KIA dap maga lai wa sai bat hta hkap shingla gasat ai hta Myen hpyen hpri gang mawdaw langai hpe gap jahten kau ya lu wa sai re.
