Nawnglut Ginwang Kata Na Myen Hpyen Dap Shara 3 Hpe KIA Padang Dip Zing Madu
Nawnglut Ginwang kata na Myen hpyen dap shara 3 hpe KIA hte pawng hpawm dap ni htim gasat zing madu la lu sai lam shawng lam magam gun ni kaw na chye lu ai.
Nawnglut hte Hpakant lapran na Myen hpyen dap hte Sam Hkyeng Pyithutsit dap ni pawng hpawm nna dung ai Wey Lung, Nyaung Pin, Chaung wah dap shara masum hpe htim gasat zing madu la lu sai nga, shawng lam magam gun langai KNG shiga dap de tsun dan ai re.
“Myen hpyen dap shara masum hpe lu zing la sai, ndai lahkawng ya laman hta padang dip zing la lu ai ga rai nga ai, ya htim gasat zing la lu ai shara ni hpe matut na jasan taw nga ai, ngut na ya naw ngam myen hpyen dap shara ni de mung majan naw byin taw nga ai,” nga tsun ai re.
Dai dap shara ni hpe KIA hte PDF pawng hpawm dap maga June 22 ya jahpawt kaw na htim gasat hpang wa ai rai nna, Wey Lung hte Nyaung Pin dap hpe mani hpawt June 23 ya jahpawt htim gasat zing madu la lu nna, Chaung Wa Myen hpyen dap hpe gaw dai hpawt manap zing madu la lu ai nga, matut tsun dan wai re.
Ya htim gasat zing madu kau ai dap shara ni gaw, Indawgyi hka nawng kaba hte Hpakant mawdaw lam kaba hpe shim lam la da ya ai, hpyen masa lam hta ahkyak ai dap shara ni rai nna, hpyen n-gun 30 hte 50 grup yin nga ai dap shara re lam chye lu ai.
Dai shara ni hpe htim gasat ai nhtoi 2 ya laman hta Myen hpyen dap maga na Jet Nbungli ni hte wa htim gap gasat wa ai sha n ga, Hopin, Na Mawn mare hta dung ai Myen hpyen dap ni kaw na majan byin ai shara de laknak kaba gap garum wa ai nga ginra masha ni tsun ai.
KIA maga Nawnglut ginwang kata na Myen hpyen dap shara ni hpe htim gasat ai lam gaw, Hpakant Gwi Hka lam kaba hpe jum tek kau mayu ai masa lam a majaw, dai shara ni hpe htim gasat ai re nga ginra masha ni tsun maram da ai re.
Ya majan byin nga ai shara gaw, Hopin, Na Mawn, Mai Nawng, Chaung Wah, Tamahkan, Gwi Hka, lam mayan na ahkyak ai dap shara ni rai nga ai.
Ya ten dai ginra mayan hta matut naw ngam ai Myen hpyen dap ni gaw, Lung Tung, Na Mawn Myen hpyen dap shara ni rai nna, dai mayan de mung hpyen masa matut shaja hkat taw nga ai lam chye lu ai.
Hpakant Tamahkan Gwi Hka mare ni hpe lai wa sai February shata hta KIA htim gasat zing madu kau ai hpang, Hopin Indaw Gwihka lam mayan hta nga ai dap shara ni hpe bai htim gasat zing madu la lu wa ai rai nga ai.
