Waimaw Chihpwi lam ntsa na, Sani Hku mare hta dap jung da ai Myen hpyen dap shara lahkawng hpe KIA hte pawng hpawm dap maga June 13 ya shana htim gasat zing madu kau lu wa sai re.
KIA htim gasat zing kau ai Sani Hku mare na dap shara 2 gaw, Myen hpyen dap ni nga ai dap shara langai hte, Pyithutsit hte BGF ni pawng na nga ai dap shara langai re lam KIO Shiga magam dap lithkam Dukaba Nhpang Naw Bu tsun ai re.
“Sani Hku dap shara lahkawng hpe lu zing la ai, mani shani ka-ang daram aten hta zing madu la lu wa ai, dai dap shara lahkawng gaw Myen hpyen dap shara langai rai nna, Pyithutsit, BGF pawng nga ai dap shara langai re,” nga tsun ai.
Dai dap shara lahkawng hta hpyen n-gun 40 daram nga ai rai nna, Waimaw – Chihpwi lam kaba ntsa hta dap jung nga let, lai wa lai sa mung mare masha ni hpe jahkrit sharim san jep nna, gumhpraw ladu lai hta sha taw nga ai shara re lam chye lu ai.
Dai dap shara hpe lai wa sai June 11 ya shani Chihpwi lam numshe hpe htim gasat zing madu ai KIA ni Chihpwi Pang Wa maga de lung wa let shang htim gasat zing kau da ai masa re nga, ginra masha ni tsun ai re.
Chihpwi lam numshe deng 13 shagyit hpe htim gasat zing madu kau ai hpang, Sani hku dap shara hpe grai wa gap gasat ra ai lam n nga ai sha, Myen hpyen dap hte Pyithutsit ni hprawng mat ai re lam chye lu ai.
Sani Hku Myen hpyen dap shara gaw, dai mayan hta ahkyak dik dap shara langai rai nna, Waimaw Chihpwi lam lapran hpe madung shim lam la ya taw nga ai dap shara re lam chye lu ai.
