Myen Hpyen dap Gap Dat Ai Lakna Kaba Si a Majaw Mung Shawa Marai 1 Si Nna, Marai 6 Hkala
Myen hpyen dap gap shadam dat ai laknak kaba si Hkat Cho mare hta wa hkrat ang ai majaw, mung shawa marai 1 si nna, marai 6 hkala hkrum wa ai lam chye lu ai.
June 10 ya shana hkying 8 daram aten hta, Myitkyina maga de na gap dat ai laknak kaba si Hkat Cho lahta tsang jawng makau na dum nta langai hta wa hkrat ang ai majaw, dai kaw nga ai mung shawa marai 7 hkra ai hta langai gaw tsi rung du ai hpang si nna, laga ngam ai marai 6 gaw hkala hkrum wa ai nga, dai ginra na mung shawa langai KNG shiga dap de tsun ai re.
“Mana hkying 8 hta n’ta langai kaw laknak kaba wa hkrat ai, marai 7 hkra ai, langai gaw tsi rung du ai hte si ai, hkala sawng ai 4 hpe gaw kalang dat leng masum hte tsi rung de htaw sa mat ai,” nga tsun dan ai re.
Ya si hkrum ai wa gaw, asak 26 ning ram re ai Ko Thar Nge ngu ai wa rai nna, laknak kaba si wa hkra ai majaw, Waimaw mung shawa tsi rung du ai hpang si hkrum wa ai re nga matut tsun ai.
Laknak kaba hte hkala hkrum ai ni gaw, Ko Ar Kar asak 28 ning, Nan Poe asak 26 ning, Aung Kyaw Myint asak 27 ning, Daw Nyut Hkaing asak 50 ning, Ah Shan Kaw asak 50 ning hte laga mying n chye ai marai 1 rai nna, dai hta tsang ra ai madang hkala sawng ai marai 3 lawm ai lam chye lu ai.
June 10 ya jahpawt jau Hka Shi mare makau hta Myen hpyen dap hta KIA pawng hpawm dap maga ang katut htim gasat wa ai lam nga ai rai nna, Myen hpyen dap kaw na dai ginra de laknak kaba ni hte hkrup mara gap shadam bun wa ai lam nga ai re.
Myen hpyen dap maga na Waimaw (58) dap na gap bun ai lam nga ai zawn, Myitkyina maga de na mung gap bun wa ai majaw, ya na zawn si hkala hkrum wa ai re nga tsun ai.
Ya na zawn laknak kaba gap shadam bun taw nga ai majaw, lai wa sai shata hta mung si hkala ai lam nga wa nna, June 8 ya shana gap bun ai hta mung, mung shawa dum n’ta hkra hten wa ai re.
Waimaw Shwenyaung Pin Myen hpyen dap hpe KIA hte pawng hpawm dap maga htim gasat zing madu kau ai hpang dai ginra mayan hta shani shagu ngu na hpyen masa shaja hkat taw nga ai zawn, Myen hpyen dap maga na mung laknak kaba ni hkrup mara gap shadam bun nga ai re.
