Hpakant Ginra KIA Htim Gasat Zing Madu Da Ai Shara Ni Hta Jawng Hpaw Na Matu Hkyen Shajin Nga
KIA/KIO htim gasat zing madu da ai Hpakant ginwang kata na mare kahtawng ni hta hpaji jawng ni hpaw sharin sa wa na matu hkyen shajin taw nga sai lam, dai ginra na lit nga ai ni kaw na chye lu ai.
Dai ning laman htim gasat zing kau lu ai Tamahkan, Gwi Hka, Namting, Namya hte Sezin mare ni hta KIO uphkang sai ru jahkrat let up hkang taw nga sai rai nna, KIO a hpaji masing hte jawng ni hpe hpaw sa wa na matu shajin taw sai nga, Namya ginra na lit nga ai salang langai KNG shiga dap de tsun dan wa ai re.
“Kapmaw lahta de na mare yawng hte ndai Namya mare na lawu tsang lapran tsang ni hkan gaw KIO hpaji masa hte sharin sa wa na hku rai sai, Namya lahta tsang jawng gaw sharin sara mung rai n law ai majaw, shawoi na hku naw matut hpaw sa wa na, dai kaw Jinghpaw laika subject langai sha jat na, laga ngam ai gaw myen jawng sharin ginhpan hte naw sa na hku re,” nga tsun dan ai re.
Matut na Gwi Hka, Tamahkan hte Sezin mare maga ni hta gaw, NUG a sharin ginhpan lam ni matut sharin sa wa na lam nga ai hpe chye lu ai.
Ya ten hpaji dap ni hta magam gun law law matut ra gadawn taw nga ai majaw, shawoi mi na Myen jawng sharin sara saranum ni hpe sha matut jai lang mat wa na rai nna, dai ni hpe KIO a hpaji hkrang masa lam ni hpe wunkat jaw sa mat na lam chye lu ai.
Ya ten KIA htim gasat zing madu da sai shara ni hta, hpaji jawng ni hpe bai hpaw sa wa lu na matu, jawng sara saranum magam gun law law ra gadawn taw nga ai lam, lit nga ai ni kaw na tsun n dau da ai re.
