Majan a majaw hten za mat ai Tamahkan mare hpe, Lung Seng htu na matu hkyen taw nga ai lam ginra masha ni kaw na chye lu ai.
February shata htum maga hta Majan laja lana gap gasat hkat wa ai hta, Myen hpyen dap maga nbungli, laknak kaba ni hte wa gap sharu bun ai majaw, hten za mat ai Tamahkan mare kaba hpe Lung Seng Company lauban ni kaw na, manu shagrit mari la nna, lung seng htu na matu hkyen taw nga ai nga dai ginra na mung shawa langai KNG shiga dap de tsun dan wa ai re.
“Tamahkan mare na lamu ga dum nta wang langai lap Sen hkying manga, hkying matsat tsa dan ai re, rai tim Company maga na gaw, Sen tsa lam sha jaw nna, mari taw nga ai, nkau gaw nta wang sha n dut kau yang ningnan kaw na bai gap gap la na n loi mat sai, dai majaw dut ai ni mung nga ma ai, dai hpe lauban ni manu shagrit na galaw taw nga ai.” nga tsun ai re.
Tamahkan mare Lung Seng htu na lam hte seng nna, ndai laman Lungseng Company ni hte KIO Salang ni, mare masha ni rai pawng hpawm nna jahkrup bawng ban taw nga ai lam chye lu ai.
Dai mare gaw, laga mare ni hta Lungseng kaja grau pru ai shara rai nna, shawoi nta lamu ga man, Pe 80, Pe 100 nga ai dum nta wang langai gaw, sen 5000 hte sen 8000 manu pru ai shara re nga ginra masha ni tsun ai re.
Tamahkan mare hpe ya ten, KIO uphkang sai ru jahkrat let uphkang nga ai mare kaba langai rai nna, ya ten lung seng htu na matu, KIO hte jahkrup bawng ban taw nga ai ten mung rai nga ai.
Dai mare gaw, nta htinggaw 800 jan nga ai mare kahtawng rai nna, Majan ten laman nta 500 jan hten mat ai majaw, ginra masha ni kaw na dum n’ta bai gaw gap la na yak hkak mat ai majaw, lamu ga dut mayu ai ni law wa ai mung rai nga ai.
Ya ten dai mare de mung shawa yawng bai mai wa nga sai rai tim, nta nlu mat ai mung shawa ni law ai majaw, hpyen yen shara ni hta matut nga taw ai ni law law re.
Tamahkan mare hpe KIA hte PDF pawng hpawm dap ni kaw na lai wa sai February 10 ya jan kaw na htim gasat hpang wa ai gaw, March 9 ya shani htim gasat zing madu la kau lu ai rai nga ai.
