Lani Mi Laman Myen Hpyen Dap Shara 10 Jan Hpe KIA Htim Gasat Zing Madu

KIA Ginajaw Laiza mare de laknak kaba gap bun taw nga ai Hpun Pyen bum Myen hpyen dap hte hpawn laga shawng lam dap shara kaji 10 jan hpe htim gasat zing madu la lu sai lam Dukaba Nhpang Naw Bu tsun ai re.

March praw 7 ya jahpawt hkying 6 daram kaw na, KIA Ginjaw ginra makau grup yin hte, Myitkyina Manmaw lam kaba ntsa na Myen hpyen dap ni hpe htim gasat ai hta ya na zawn zing madu la lu wa ai re lam tsun ai re.

“Laiza hte ni kahtep dik htum ai rai nga ai Hpunpyen bum dap kaba hpe gaw zing la lu sai, Bumre bum, Hkaya bum, Shadan Pa, shara shagu hkan na shawn lam ကာကင်း post shara 10 daram hpe zing la ngut sai,” nga tsun ai re.

Dai ni htim gasat ai hta, Myitkyina Manmaw lam kaba ntsa na Mali Myen hpyen dap, Hpun Pyen bum, Shadan Pa Myen hpyen dap, Ta Hkaw Hka Myen hpyen dap, Goi Kahtawng Myen hpyen dap, Nlung Hka Pyithutsit dap ni hpe htim shagrawt kau lu sai re.

Matut na mung, Myothit, Kunglaw hte Numlang maga de mung majan matut laja taw nga nna, Myen hpyen dap maga sum machyi lam ni law taw nga ai lam ginra masha ni tsun ai re.

Myen hpyen dap maga laknak kaba gap bun ai majaw, Woi Chyai tsi rung magam gun ni nga ai nta yan hta wa hkrat ai majaw, mung shawa marai 3 asak si sum nna, marai 1 hkala hkrum wa ai re.

Ya na zawn Myen hpyen dap shara hpe htim gasat ai hta Myen hpyen dap maga sum machyi lam ni law ai majaw, nbungli hte wa gap bun ai lam ni mung nga ai re.

Dai zawn nbungli hte wa gap bun ai hta, Laiza makau grup yin hta kalang wa gap bun kau da nna, Laisin mare kata hta mung mali lang wa gap bun kau da ai lam chye lu ai.

Dai ni lani mi laman KIA maga Myen hpyen dap shara 10 jan hpe kalang dat ma ja shang htim gasat wa ai mung rai nga ai.

Ya ten Laiza makau grup yin na mung shawa ni tinang shim lum ai shara ni de hprawng yen taw nga ai lam chye lu ai.

Myitkyina Manmaw lam kaba ntsa Myen hpyen dap hte KIA dap lapran majan laja lana matut gap gasat taw nga nna, Myen hpyen dap maga mung nbungli hte ding yang wa gap garum taw nga ai lam shawng lam magam gun ni tsun ai re.