Hopin Mung Nyang Hka Grupyin De Htu Shadut Wa Ai Myen Hpyen Hpung Hpe KIA KPDF Dap Hkap Shingla Gasat
Hopin mare kaba sinpraw maga, Mungnyang Hka mayan de Myen hpyen dap hpyen shamu shamawt shang wa ai majaw KPDF dap ni hkap shingla gasat ai kaw na majan byin wa ai lam chye lu ai.
February 28 ya jahpawt hkying 9 daram hta Myen hpyen hpung hpe KPDF dap hkap shingla gasat ai kaw na, majan byin wa nna, lahkawng maga laknak kaba ni hte gap gasat hkat wa ai re nga , dai ginra na KPDF lit nga ai ni KNG shiga dap de tsun ai re.
“Myen hpyen dap ni gaw ya hte mahkrai pawt sa htu di da ai, ya dai kaw shan hte dap jung na hkyen wa ai majaw, hpyen shamu shamawt shang wa ai, dai hpe hkap shingla gasat ai kaw na majan byin wa ai re.” nga tsun dan ai re.
Ya ten majan laja taw nga ai majaw, lahkawng maga si hkala sum machyi ai lam hpe a tsawm tup hkrak rai n chye lu shi ai rai nna, dai ginra na mung mare masha ni yawng hprawng yen taw nga ai re.
Myen hpyen dap gaw Mungnyang hka mahkrai pawt hta dap jung shara jahkrat na matu, shakut taw nga ai majaw, ya ten dai ginra hta hpyen masa shaja hkat taw nga ai rai nna, KIA woi awn ai PDF dap maga de na mung hkap shing la gasat taw nga ai re.
Dai hpyen hpung hta, Sam Hkyeng SNA dap hte Pinbaw mare daju Myen hpyen dap Hk.M.Y 521 dap ni rai nna, ya ten dai Mungnyang hka mahkrai pawt hta dap jung shara jahkrat na matu shakut taw nga ai re.
Dai Myen hpyen hpung ni gaw, lai wa sai February 23 ya shani Mungnyang hka mahkrai pawt hpe sa htu di kau nna, dai shara hta dap jung na matu hkyen taw ai mung rai nga ai.
Ya gap gasat hkat taw nga ai shara gaw, Hopin mare a sinpraw maga deng 3 daram tsan ai Mungnyang hka grup yin hta rai nna, ya ten du hkra hpyen masa matut shaja hkat taw nga ai re.
