Dawhpum Yang kaw nna Hkaya Bum, Bumre Bum Myen hpyen dap shara ni de, malu masha hte laknak machyu pala wa htaw sa ai Myen hpyen hpung ni hpe KIA dap ni lam lapran hta hkap shingla gasat ai kaw majan byin ai lam, ginra masha ni tsun ai re.
Shata 3 jan na sai, Dawhpum yang Myen hpyen dap Hk.L.Y 142 hta htaw tawn ai, laknak arung arai hte malu masha ni hpe Hkaya Bum de htaw shalai la lu na matu, Myen hpyen n-gun 100 jan hte lam makau grup yin de shara la wa ai majaw, gap gasat hkat wa ai re nga, ginra masha langai KNG de n dai zawn tsun ai re.
“Dawhpum Yang kaw du da ai hpyen lang arung arai hte malu masha ni hpe Hkaya Bum de bai wa htaw sa na matu hkyen lajang taw nga ma ai, dai mawdaw ni rai n lung shi yang lam de shim lam shawng la taw nga ma ai, dai shim lam la ai hpyen hpung ni hpe KIA ni gap gasat ai majaw, majan byin ai dai ni hte rai yang masum ya rai sai,” nga tsun dan ai re.
Shim lam la ya nga ai Myen hpyen hpung ni hpe KIA Dung 19 ni sa htim gap gasat taw nga ai rai nna, majan byin ai n htoi 3 ya rai sai lam chye lu ai.
Dawhpum Yang hte Dingga lapran dai shara mi hta sha, December 14 ya shani hkying 12 hta kalang, 13 ya shani hta kalang, 15 ya shani hta kalang n htoi 3 ya shani shagu ngu na gap gasat taw nga ai re.
Dawhpum Yang kaw na lung wa ai Myen hpyen hpung ni hpe Dingga mare makau hta hkap shingla gasat taw nga ai majaw, Myen hpyen hpung maga sum machyi ai hte dai kaw na n lu lai lung wa hkraw taw nga ai re.
Myen hpyen dap malu masha hte hpyen lang arung arai ni hpe htaw shalai la lu na matu, hpyen n-gun 200 daram hte Dingga lahta, Na Lung, Dung Hkung, Hka Ya lam makau grup yin hku shim lam la taw nga ai mung rai nga ai.
Dawhpum Yang Myen hpyen dap hta shatup da ai Myen hpyen Mawdaw 30 daram gaw, lai wa sai August shata daram hta Mandalay kaw na hka sanghpawli hte htaw shadu da ai hpyen lang arung arai ni rai nna, lai wa sai August shata hta Hkaya de htaw lung wa ai hpe, Hkala gadawng hta hkap shingla gasat hkrum ai majaw, Dawhpum Yang hta bai wa majaw taw nga ai re.
Myitkyina Manmaw lam kaba n tsa, Myen hpyen dap hte KIA dap lapran majan laja lana bai gap gasat hkat wa ai majaw, mawdaw lam kaba pat da ai shata 6 hkawt du wa nga sai re.
