Jinghpaw-Sagaing jarit, Indaw ginwang, Mandalay-Myitkyina lam kaba makau na, gat seng yan hpe Myen hpyendap nbungli hte wa gap bun ai majaw, hkrun lam hkawm mung shawa langai asak si sum wa ai lam, chye lu ai.
Mandalay-Myitkyina Mawdaw lam kaba makau, Indaw Saw Maw Chaung (စော်မှော်ချောင်း) makau na gat seng yan hpe November 19 ya shana maga hkying 2 daram hta, Myen hpyen dap maga nbungli hte wa gap ai majaw, amyu shayi langai dai shara hta nan si nna, La marai 2 hkala hkrum wa ai nga dai ginra na amyu shayi langai KNG de ndai zawn tsun dan wa ai re.
“ Nbungli hte bawm wa jahkrat ai gaw, Myitkyina Mandalay lam kaba makau gat seng yan nga ai shara hta hkran lam hkawm mung shawa ni pat hkrum taw nga ai, dai shara hpe n bungli hte wa gap ai, dai majaw hkrun lam hkawm mung shawa ni si hkala hkrum wa ai,” nga tsun dan ai re.
Si mat ai amyu shayi gaw, asak 30 ning daram re rai nna, hkrun lam hkawm taw nga ai ten si mat ai majaw, gara kaw na gadai re ngu hpe a tsawm tup hkrak rai n lu sagawn shi ai lam matut tsun dan ai re.
November 19 ya shana maga, Myen hpyen Jet Fighter nbungli 2 hte dai grup yin pyen gawai kau da nna, laknak kaba si 10 jan jahkrat bun kau da ai hte jak sinat hte mung gap bun kau da ai lam nga ai hpe chye lu ai.
Myen hpyen dap n bungli hte gap bun kau da ai majaw, mung shawa si hkala ai lam sha n ga, gat seng ni yawng mung hten mat ai re.
Myen hpyen dap dai zawn nbungli hte bawm jahkrat ai majaw, ginra masha ni yawng hprawng yen ma ai hpang, dai shara hta Myen hpyen n gun 70 daram hte wa du dap jung nga ai lam chye lu ai.
Myen hpyen dap nbungli hte wa gap ai shara gaw, Indaw muklum hte deng 6 daram tsan ai shara rai nna, dai shara hta nta hting gaw 10 daram hte lu sha gat seng ni hpaw da ai shara rai nna, dai shara hta hpyen hte seng ai hpa mung n nga ai shara re lam ginra masha ni tsun ai re.
Ya ten Myitkyina Mandalay lam kaba ntsa, Htichyaik muklum hta Myen hpyen dap hte KIA dap lapran majan laja lana gap gasat nga nna, Mandalay Myitkyina lam kaba hpe matut pat da ding yang rai nga ai re.
