Sagaing, Kawlin mare kaba hpe rawt malan hpung ni zing madu kau ai hpang, majan lapran chyat rawng taw nga ai mung shawa ni hpe mung shalawt shapraw la lu sai lam, ginra daju PDF dap ni tsun ai re.
Ya ten hprawng yen taw nga ai, mung shawa Mun 5 jan hpe, ginra daju PDF dap ni gaw, ra mara yawng hpe hkan garum madi shadaw taw nga ai lam chye lu ai.
Kawlin mare hpe KIA hte PDF dap ni yawng htim gasat zing madu la kau sai rai tim, Myen hpyen dap maga de na nbungli hte bai wa gap na masa nga ai majaw, mung shawa ni hpe mare de rai n shang shangun shi lam, ginra Uphkang hpung maga tsun ndau da ai re.
Kawlin mare kaba hpe KIA woi awn ai hte PDF pawng hpawm dap ni shang htim gap gasat zing ai hta, Myen hpyen dap maga nbungli hte wa gap ai majaw, mung mare masha marai 10 daram si ai lam ginra masha ni tsun ai re.
Ya ten dai ginra hta Myen hpyen dap hte ginra daju PDF dap lapran hpyen masa matut shaja hkat taw nga nna, Wuntoo Myen hpyen dap kaw na laknak kaba ni hte matut gap bun taw nga ai re lam chye lu ai.
Kawlin Mare kaba hpe KIA hte PDF dap ni November praw 2 kaw na htim gasat wa ai gaw, November praw 6 ya shani tsep kawp zing madu la lu sai lam PDF dap maga ndau wa ai re.
