Hpakant Seng Tawng hte Gwi Hka lam kaba n tsa Phone shadaw jun ai kawng na hka htung makau hta si yet taw nga ai masha mang 2 hpe sa mu ai lam ginra masha ni tsun ai re.
September 21 ya jahpawt moi mang hpe sa mu ai rai nna, dai kaw si taw ai yan gaw, asak 30 ning daram re la lahkawng rai nna, si taw ai yawm htum n htoi 10 ya daram du sai lam, shinggyim nau na garum ningtum hpung na lit nga ai salang langai KNG de tsun dan ai re.
“Myi man gaw gadai re hpa n chye yu sai. yawng yet taw sai. dai majaw, madu n nga ai moi mang hku na sha lup makoi kau sai.” nga tsun dan ai re.
Dai yet si taw ai yan a moi mang hpe yu yang, myi man hta Tik hte dumbat da ai hkang hkang ai hte, lata hpe shingdu de gyit da ai hkang hkang ai lam, garum kahtau hpung ni matut tsun dan ai re.
Dai zawn re mabyin lai wa sai July 24 ya shani Sabyit Hku mare na mare salang Awng Lin n ta kaw nga taw ai ten, laknak lang wuhpung langai mi sa gyit rim woi mat ai hpang shani dai zawn sat da ai mabyin lam nga wa ai hpe chye lu ai.
Hpakant ginra hta Myen hpyen dap daru magam zing kau ai hpang, dai zawn masha sat ai amu mang hkang jahkring hkring byin pru nna, mare uphkang salang ni sat hkrum ai lam ni mung nga wa ai re hpe chye lu ai.
