Hpakant, Sabyit Hku mare ting hpe htawt sit kau nna lung seng htu na matu hkyen taw nga ai lam, dai ginra hta nga ai mung shawa ni tsun ai re.
September praw kaw nna, Wunpawng Mungdan Shanglawt Asuya, Uru ginwang ginjaw, Hpakant ginwang woi awn ai hte n ta hpan hpe yu nna, A, B, C, madang garan let, nta gawgap manu, htawt sit manu ni hpe sawn maram nna, bawng ban jahkrup taw nga ai lam, Sabyit hku mare na amyu shayi langai KNG shiga dap de tsun dan ai re.
Ya sawn maram da ai manu jahpu gaw, n dai ten na gun rai manu hte n htuk ai majaw, mare masha law malawng myit n hkrum taw nga ai lam, amyu shayi langai n dai zawn tsun dan ai re.
“Nkau mai byin ai hku gap da ai n ta ginsum ni na matu gaw manu ai le, ya law malawng nta grak lagra rai na gap da ai ni a matu gaw, shan hte jaw ai manu hte ya na dai zawn re n ta gara hku mung n lu gap la ai, dai majaw myit n hkrum ai law taw nga ai.” nga tsun dan ai re.
Ndai zawn htawt sit na lam hte seng na KIO asuya maga, Sabyit hku mare hte gade n tsan ai, Woi hpraw mare hta shara ningnan jahkrat da ya ai rai nna, n ta hting gaw langai hpe Pe 40 × 60 dam ai lamu ga hte rau, htawt sit manu, ya rawng taw ai n ta manu ni hpe jaw let htawt sit shangun taw nga ai re lam matut chye lu ai.
Ya nga taw ai Sabyit Hku mare gaw, Hka, Wan, Lam ni yawng a tsawm grak rai nga taw ai mare kahtawng re majaw, ya bai htawt sit shangun ai mare ningnan hta dai ni yak hkak na hpe myit tsang ai nga, ginra masha ni matut tsun ai re.
Ndai Sabyit Hku mare htawt sit na lam hte seng na, lit nga ai KIO maga de KNG kaw na matut mahkai yu ai rai tim, hkrum shaga lu ai lam n nga ai re.
Sabyit Hku mare hta, n ta hting gaw 160 jan hte masha marai 500 jan nga ai mare kahtawng langai rai nna, lai wa sai shaning 40 ning daram kaw na gaw de da ai mare kahtawng re lam chye lu ai.
Ya ten Hpakant ginra hta lawu ga na, htawt sit bungli galaw masha 300,000 jan wa du bungli galaw nga ai lam, ginra masha ni hta gahkyin da ai jahpan kaw na chye lu ai re.
