Shwegu mare, Myen hpyen balik dap hpe, KPDF dap ni kaw nna, drone hte bawm 2 lang sa jahkrat bun wa ai lam, ginra daju PDF dap ni kaw nna chye lu ai.
September praw 3 ya shana kalang, praw 4 ya jahpawt kalang sa jahkrat bun wa ai rai nna, dai sa jahkrat bun ai hta, si hkala ai lam nga n nga hpe a tsawm tup hkrak n chye lu ai re.
“Anhte gaw, hpyen wa nga ai shara kaw aten n lata galoi ten rai tim sa htim gasat na sha rai nga ai. hpyen wa shamu wa yang sha n re, galaw ra ai lam hpe galoi mung galaw taw na sha re.” nga tsun ai re.
Myen hpyendap gaw Bawm sa jahkrat hkrum ai hpang, lai sa lai wa mung mare masha ni hpe laja lana san jep ai lam, galaw wa ai re hpe matut chye lu ai.
Shwegu Balik dap gaw, lai wa sai shata ni hta mung jahkring hkring sa gap hkrum ai majaw, dai balik dap hta, Myen hpyen magam gun ni kadai mung n gwi yup mat nna, Hpyendap kawng de wa yup ai lam ni galaw nga ai re hpe chye lu ai.
