Myitkyina Manhkring manam jarawp langai hta KIO magam gun ningtau uphkang Du marai 2 hpe Myen hpyendap ni rim woi mat ai lam KIO hte ni nawn ai ni kaw na chye lu ai.
June 5 ya shana hkying 12 daram kaw Myen hpyen dap hte Ts.Y.Hp, Immigration dap ni du wa nna, sa jep ai kaw rim woi mat ai re lam, KIO hte ni nawn ai marai langai ya na zawn tsun ai.
“Re rim hkrum ai teng ai re. KIO kaw na Ninghtawn Ningtau Uphkang Du 2 re. Shanhte dai manam jarawp de sa manam ai kaw na shiga jaw ai ni nga ai masa re” nga na tsun ai.
Rim hkrum mat ai Uphkang Du yan gaw Myitkyina Ninghtawn na Salang Kaba, Jumhpawk Lum Dau Ninghtawn Ningtau Uphkang Du hte Zi-Um Ninghtawn na Salang Kaba, Lamai La Sam Ninghtawn Ningtau Uphkang Du yan re lam chye lu ai.
Myitkyina mare kaba kata Myen hpyen dap hpe shiga jaw ai ni grai law wa ai majaw, mare kaba kata hta bungli shang shamu shamawt na matu grai yak wa ai lam KIO hte ni nawn ai ni tsun ai re.
“Ya gaw KIO de na Uphkang Du ni grai rim hkrum da majaw, grai yak mat ai. shiga ni gaw grai lawan ai re. Tinang kade shakut tim nkau ni hpe yu na grai myit daw wa ai re kalang lang gaw grai nkam tsun ai. Gumhpraw grai lu sai nga ni she Myen hpyen dap hte rau galaw sha ai ni tai mat ai” nga na rawt malan magam bungli hta shanglawm nga ai, Myitkyina ginra masha langai kawn maram tsun ai re.
2023 ning May shata laman, Myitkyina hte Hpakant ginra hta KIO/KIA salang ni rim hkrum ai hpe KNG shiga dap kaw na sawk gahkyin da lu ai hta, May 6 ya shani Happy KTV kaw marai 6 rim hkrum nna, May 25 ya shani Maw Wan lawk kaw marai 2 rim hkrum ai ni yawng marai 8 tup nga nna, Happy KTV kaw rim hkrum ai marai 6 gaw bai lawt wa sai lam chye lu ai.
