Hopin mare kaba grupyin hta gawn hkang lit nga ai Myen hpyendap npu Balik langai hpe KPDF ni rim wa ai shaloi, sinat gashun hprawng ai majaw, gap sat kau sai lam KPDF ni hte ni nawn ai ni kaw na chye lu ai.
June praw 3 ya jahpawt hkying 10 daram hta dai Balik wa gaw Ta Kun mare de hpaida wang hkan gumhpraw hta na bai wa ai kaw rim la ai re lam chye lu ai.
Gap sat kau hkrum ai wa a mying gaw U Win Ko Ko ngu rai nna, hkumdek masat (363266), Gyi tsang re. Nga shara gaw Bago Thaing, Htan Dapin kaw na rai nna, 1995 shaning kawn Bago Thaing Balik dap de shang wa ai re lam chye lu ai.
Bago Thaing Balik dap kaw na 2014 ning hta Jinghpaw mung, Putao Balik dap de htawtsit wa ai re lam chye lu ai.
Bai na 2020 ning kawn Hopin Balik dap de bai htawt wa nna, ginra gawn hkang bungli gunhpai nga ai re lam chye lu ai.
Ginra gawn hkang bungli gun hpai nga ai ten, 2021 ning Hpyen dap ni daru magam zingla kau ai hpang Mu Nyin Myo NLD dat kasa Daw Thet Hta Nawng hpe August 4 ya shani sa rim ai hta shanglawm ai rai nna, NLD dat kasa ni hpe tara jewat ai hta amu shawk ai wa re lam, chye lu ai re.
Myen hpyen dap ni daru magam zing kau ai hpang myen hpyen dap npu Balik ni hte hpyen dap shatsam da ai uphkang salang ni jahkring hkring sat hkrum ai lam ni mung byin nga ai re.
