Sezin mare hta dap jung shara jahkrat tawn ai, Myen hpyen dap ni kaw na, makau grup yin shara ni de laknak kaba majoi hkrup mara gap bang taw ai majaw, Jamaw ginra hte mare kaji kahtawng 20 ram na mung shawa 300 ram Hpakant Tamahkan de bai hprawng yen pru wa ra ai lam chye lu ai.
Mana August 11 ya shana kaw na Sezin mare makau hkan, laknak kaba shana tup gap bang wa ai majaw, grupyin hkan nga ai mung shawa ni, dai ni hpyen yen dabang de bai hprawng yen wa ra re lam, ginra masha, KNG shiga dap de ya na zawn tsun ai.
“Myen hpyen dap ni gaw hpa majan byin ai lam n nga ai rai tim, anhte mung shawa ni nga ai maga de laknak kaba ni hte gap bun taw ai. Shanhte chyawm PDF hte KIA ni nga ai shadu na gap ai she nrai i, raitim anhte mung shawa ni gaw laknak kaba n sen n sim n sa ngoi wa yang gaw hkrit ai, hkrit ai majaw yawng hprawng yen pru wa ai.”
Matut nna, Myen hpyen dap gaw, KIA Dung 26 hpe gasat na masing hte Holicopter n bungli, hpyen n gun ni ding yang jat da nna, mani hpawt hkying 11 ram aten hta mung, hpyen n gun 60 ram hpe wa jahkrat kau da ai lam shawng lam hpyen shi sawk ni shana wa ai kaw na chye lu ai.
Shingrai, KIA Dung 26 ginra de Myen hpyen dap ni kaw na htu shadut htim gasat shang wa ai rai yang, a ten n tam majan n hpan laja wa mai lam, shawng lam magam gun langai KNG shiga dap de tsun ai.
“Dai Myen hpyen hpung ni ya ten Sezin maga de rai n shang shi ai, n dai de shang wa jang gaw, majan matut laja na re” nga shana wa ai.
August praw 8 ya shani majan byin ai hpang, Myen hpyen dap hte Sam Hkyeng SNA dap ni Sezin mare na mung shawa n ta 600 jan wan nat jahten kau ya nna, mung shawa ni a manu dan ai arung arai ni hpe mya la mat wa ai lam ginra masha ni kaw na chye lu ai.
Myen hpyen dap ni kaw na dai mare hta n bungli bawm jahkrat bun nna, gap sat kau hkrum ai mung shawa marai 35 hte 40 lapran nga ai lam ginra masha ni matut shana wa ai.
Ya ten, Sezin makau grup yin mare na mung shawa ni, Hpakant Tamahkan, Hawng Pa mare hkan matut hprawng yen jat taw nga ai majaw, Hpyen yen mung shawa 5000 jan nga sai rai nna, grau law jat wa na lam sha re majaw, hpyen yen mung shawa ni a matu garum ningtum malu masha ra ahkyak taw ai lam chye lu ai.
N dai hpyen yen ni gaw, shan hte a dum n ta yawng wan nat jahten kau hkrum sai rai nna, mare buga dum n ta de aloi sha bai n htang wa na nloi sai re majaw, aten galu nga lu na matu lam shagu hta garum la ra nga ai lam chye lu ai.
