Jinghpaw Mungdaw dingda maga Manje mare e ma kaji ni ginsup yang lang ai nbung sinat ni hpe asuya uphkang salang ni hku nna kalang bai rim la nna nat jahten ai lam February 10 ya shani galaw ai re.
Shada gap hkat ginsup yang nbyin gying ai manghkang byin na hpe tsang ai majaw rim la lu ai nbung sinat 157 hpe Manje ginwang maza bum e nat jahten kau sai lam asuya shiga shapraw da ai re.
Ndai nbung sinat hpe seng kye nbung htu ai dumlawng, tsi gat pung na pipe hte hpri dumlawng kaji ni hpe pawng nna laklai ai hku galaw da ai re. Ndai sinat hpe tinang hkrai galaw la ai ni nga ai zawn, manu jahpu jaw nna mari la ai ni mung nga ai lam sagawn chye lu ai.
Manje ginwang asuya hte lawk salang uphkang salang ni ginrun nna lawk shagu hkan na sinat ni hpe hkan rim jahten ai lam rai nga ai.
lai wa sai February praw 3 ya shani mung nbung sinat 34 hpe jawng ma ni a man e lam galaw jak hte rin jahten kau sai re.
