Kachin State People Party KSPP gaw Jinghpaw mungdaw wan leng lam mayan Mugawng, Munyin mare kaba ni hta shi a party rung lakying ni hpe hpaw jat sai lam chye lu ai.
August 19 ya shani Mogawng rung, 20 ya shani Munyin rung hpaw poi hte dawng hkawn sharawt ai lamang ni hpe galaw sai lam chye lu ai.
Rung lakying lawan sa hpaw ya na matu ginra masha ni hpyi shawn ai majaw sa du shagrin ya ai re lam KSPP party a ningbaw Dr. Manam Tu Ja ndai zawn tsun ai re.
‘KSPP party hpaw sai nga shanhte na jang she shanhte hpang de galoi sa hpaw ya na nga nna ph shaga wa ai. Anhte mung dai maga de lawan galaw na ngu masing nga ai majaw rung sa hpaw ya ai rai sai.” nga nna tsun ai re.
Matut nna Namna hte Namti zawn mare ni hta mung rung lakying hpaw ai hte dawng hkawn sharawt ai lamang kade nna yang, tara shang galaw mat wa na re lam chye lu ai.
KSPP party gaw shi a rung lakying ni hpe Putao, Chipwhi, Hpakan, Machyang Baw, Naw Mung hte Waimaw ginwang ni hta hpaw da sai re.
Shi a rung daju hpe gaw Myitkyina Yuzana lawk e July shata praw hta sha hpaw poi galaw da sai re.
Lai wa sai August 15 ya shani galaw ai 2008 gawda tara gram na matu madi shadaw ai mungshawa n gun madun lamang hte August 16 ya shani galaw ai ninghkap n gun madun lamang 2 tup hta KSPP n shang lawm ai re.
2008 gawda tara gram na matu madi shadaw ai raitim, dai n gun madun lamang a matu Jinghpaw mungdaw daju mungmasa party hpe bawngban ai lam n nga ai majaw ya na zawn nshang lawm ai re nga nna tsun ai re.
