Hpakant na Myen Hpyen Dap shara (3) hpe KIA PDF htim gasat zing kau ai hpang, Min Zay Thant woi awn ai Warazup Pyithutsit hpyen Mawdaw 5 Hpakant de dai ni Hpyen n-gun bai jat lung wa ai nga, ginra masha ni tsun ai re.
Lawa kaw na Warazup Pyithutsit hpung ni dai ni April praw 6 ya shani, 4 wheel motor ( 5 ) hte Malang Dung mare maga lam hku Hpakant de hpyen n gun bai jat lung wa ai lam ginra masha langai KNG de ndai zawn tsun dan tawn ai re.
“Dai ni na Hpakant Masa lam gaw, Min Zay Thant Pyithutsit ni Hpakant de 4 wheel Motor 5 hpyen n-gun 50 bai jat da ma ai da, mu ai ni tsun yang sinat gaw n mu ai nga, dai hku mung shawa hking the sha lung wa ma ai, dai ni du lung wa ma na Tatma kawng de na ni mung bai sa tau la rai, Namhpyit နဂါးရုံဘုရား kaw wa zup la rai ma na sa tau la ma ai, Hpakant mawdaw lam kaba hku na n re sha Malang Dung maga hku na Uru hka hpe rap rai na ya gaw yawng Hpakant kaw du shatup masai, Hpyen n-gun 50 ram nga ai,”nga tsun dan ai re.
Dai na de Lawng Hkang Mare lam kaba n tsa kaw Myen Hpyen la langai mung shawa hking hte nga hkawm taw ai hpe PDF dap maga gap sat kau ai majaw, Sinat lau mi zing la lu wa ai nga, ginra masha ni kaw na chye lu ai.
Lawng Hkang Mare kaw sinat gap kapaw hkat wa ai majaw, dai na maga de kaw na Lawng Hkang Mare gat seng ni yawng pat mat nna, hkawm sa hkawm wa lam ni gadai n nga mat ai nga, Lawng Hkang mung shawa langai tsun dan ai re.
Ya ten Hpakant ginra hta Hpyen masa shaja hkat taw nga nna, Myen Hpyen dap maga Hpyen n gun gahkyin jat la ai lam ni galaw taw nga ai nga, ginra masha ni tsun ai re.
Aprl praw 2 ya shani Mawmaw Bum lam, Sutbum, Nma Yang de na Myen Hpyen dap shara (3) hpe gasat zing madu kau ngut ai hpang, Hpakant Tatma kawng hpe mung Sucide Drone the sa gap gasat ai lam ni galaw wa ai re.
Myen Hpyen dap maga na mung shani shagu nbungli wa pyen gayin ai lam galaw nga nna, lai wa sai bat kru ya shana Jet Nbungli bawm (2) lang wa jahkrat kau da ai hta lai nna, n dai lahkawng ya laman gaw, jahkrat bun ai lam n nga ai hpe shawng lam hpyen magam gun the ni nawn ai ni kaw na chye lu ai re.
Ya ten Hpakant ginra hta Hpyen masa ding yang matut naw shaja hkat taw nga ai majaw, Mung shawa ni yawng hkawm sa hkawm wa sadi na lam, lit nga ai Salang nit sun sadi jaw da ai lam hpe chye lu ai re.
