2008 Gaw da ai tara kanu hte Gumshem Myen Hpyen dap n tara masu hkalem na woi galaw ai ra lata poi na lung wa ai rapdaw datkasa ni, Naypyidaw Muklum kaba hta Munghpawm Rapdaw hpawng lamang kaba galaw nna, Gumsan magam jawm lata ai hta, Gumshem Myen Hpyendap Ningbaw galaw lai wa ai Min Aung Hlaing hpe jawm lata dang san wa ai hpe mu lu ai re.
Gumsan magam lata dan ai hta, Min Aung Hlaing wa lu ai Sindan Pa 429 hte Mungdan Gumsan magam tai wa nna, U Nyo Saw gaw Sindan pa (126) hte Ningtau Gumsan magam (1) Hpawmi Nan Ni Ni Aye gaw, Sindan pa (27) hte ningtau Gumsan magam (2) byin wa sai re.
Gumsan magam tai wa ai marai masum hpe Amyusha rapdaw kaw na Nan Ni Ni Aye, Mung shawa rapdaw kaw na, Min Aung Hlang, Hpyendap kaw na Nyo Saw ni hpe lata dang san dat ai re.
Rapdaw shagu na lata dat ai Gumsan magam ni hpe, Munghpawm Rapdaw kaw na dai ni jawm lata dang sang ai lam mung rai nga ai.
Myen Hpyen dap gaw, daru magam zing da ai hpe Mungkan kaw na madi shadaw lam lu hkra masu hkalem ai ra lata poi langai galaw dan masu nna, mung shawa kaw na lata dang san ai Asuya ngu ai madi shadaw lam hpe lu mayu nna, tau hkrau kaw na hkyen lajang da ngut sai lamang ni hpe hkrang shapraw galaw dan masu ai lam sha re nga, mung masa yu maram ai ni tsun madi madun da ai re.
