Lai Wa Sai Shaning Kaw Na Myen Ni Wa Du Dap Jung Tawn ai Dap Shara (3) Hpe Gasat Padang Dip
Hpakant Mawwan Kaba, grup yin na KIA maga tat sum da ai, Myen Hpyen shawng lam dap shara 3 hpe dai hpawt manap bai htim gasat zing la lu sai lam chye lu ai.
Dai hpawt hkying 7 aten daram kaw na htim gasat hpang wa ai gaw, dai na maga de hkying 2 aten daram hta, shawng lam dap shara masum hte hpe lu zing la sai nga KIA hte ni nawn ai Salang langai KNG de ndai zawn tsun dan wa ai re.
“Nma Yang, Sut Bum, dai lapran na Lupwa kawng shara 3 hpe lu zing la masai da, Nma Yang hte Sut Bum na shawng lu la ai, hkying 9 hte hkying 10 lapran ram kaw lu zing ai hpang, lupwa kawng hpe gaw hkying 11 ram kaw bai lu zing sai da. Myen ni gaw Mawwan Myusha jawng maga de hprawng mat ai,” nga tsun dan wa ai re.
Myen Hpyen dap shara 3 hpe gasat zing kau lu ai majaw Nma Yang – Mawmaw Bum lam kaba bai hkrang sai lam ginra masha ni kaw na chye lu ai.
KIA PDF dap ni shawng laknak kaba Drone hte htim gasat wa ai hpang, Mazup Yang htawng kaw na Myen hpyen ni laknak kaba bai gap bun wa ai lam nga ai hpe chye lu ai.
Lahkawng maga na laknak kaba si shawng de na Saung Hpalap Seng shawng kaw wa hkrat kapaw ai majaw, ma kaji marai 2 hte hpawn mung shawa marai 6 hkla hkrum wa ai lam chye lu ai.
Dai hpawt Sut Bum, Nma Yang na hprawng mat ai Myen Hpyen ni gaw, Mawwan maga de hprawng mat ai lam matut chye lu ai.
Ya ten dai grup yin de naw nga ai Myen Hpyen hpung ni gaw, Mawwan Kaba Buga Hpung na Kyuhpyi bum hte Mawwan Kaji, Mawwan kaba lapran na hpungkyi jawng ni hta matut shara la taw ai lam chye lu ai.
Myen Hpyen dap shara ni hpe htim gasat nga ai ten, Myen Hpyen dap maga na nbungli bawm lahkawng lang wa jahkrat bun kau da ai lam shawng lam hpyen magam gun hte ni nawn ai Salang wa n dai zawn matut tsun dan wa ai re.
“Nbungli bawm gaw dai ni shani ka-ang hkying 12 chyen kaw kalang, shana maga hkying 2 chyen kaw kalang lahkawng lang wa jahkrat bun kau da ai. Mission gun hte mung gap ma ai da, Nbungli du ai hpang kaw na gaw zim mat sai, ya du hkra zim taw sai,” nga matut tsun dan wa ai re.
Wunpawng Mungdan Shanglawt Hpyendap KIA the PDF pawng hpawm dap maga dai hpawt bai gasat zing ai shara ni gaw, lai wa sai shaning hta Myen Hpyen dap, Pyithutsit ni hpyen n-gun kaba hte lung wa na, wa htim gasat zing kau ai shara ni hpe bai gasat zing madu ai re lam chye lu ai.
Myen Hpyen dap maga, Seng Tawng Tamahkan shara ni hpe bai htim gasat zing la lu na matu, Hpakant Mashi Kahtawng Kyuhpyi bum hpe laja lana htim gasat taw ai ten, KIA PDF maga laga shara de hpyen man hpaw gasat wa ai masa re nga, hpyen masa yu maram ai ni tsun tawn ai re.
Hpakant ginra de lai wa sai February shata kaw laja lana gap gasat hkat taw ai rai tim, Myen Hpyen rapdaw hpawng galaw nga ai ten laman ginra shagu de hpyen majan jahkring da ai lam hpe mu lu ai re.
Hpakant kaw dai hpawt kaw na bai gap gasat wa ai gaw, KIA PDF maga na shawng sa htim gasat ai majaw, majan bai byin wa ai lam re nga ginra masha ni KNG shiga dap de tsun dan da ai re.
