Katha ginra hta ya ten Majan gan zim taw ai rai tim, Hpyen yen mung shawa ni gadai rai n wa na matu Rawt malan hpung maga tsun sadi jaw da ai lam nga ai hpe chye lu ai.
Katha Muklum hpe rawt malan hpung maga lai wa sai December 28 ya shani kaw na htim gasat hpang dat ai majan gaw, zim dat, gap hkat dat rai, dai ni ten du hkra hpyen masa matut shaja hkat taw nga ai re.
Lai wa sai 10 ram hta pawng hpawm maga bai htim gasat yu ai rai tim, masan sa ai lam n nga ai majaw, n dai laman bai gan jahkring da ai masa re nga, rawt malan magam gun the ni nawn ai ni tsun ai re.
“Lai wa sai 10 ya ram kaw Katha hpe bai nut ai masan n sa ai ga rai nga ai, ya gaw bai hkring taw sai, rai tim, anhte maga na htingnut mat ai rai n re shi ai majaw, majan gaw aten n tam bai mai sawng wa ai, Hpyen yen ni mung gadai rai nwa shi na matu tsun sadi jaw mayu ai,” nga shawng lam magam gun langai KNG de Myen ga hku tsun dan wa ai re.
Katha majan gaw, Rawt malan hpung maga thing nut ai lam rai n nga shi ai majaw, aten n tam majan kaba matut naw mai byin wa ai majaw, Hpyen yen mung shawa ni gadai rai n wa shi na matu, rawt malan hpung maga tsun da ai re.
Myen Hpyen dap maga na mung Katha muklum shara shagu de hpyen n gun jahkrat da ai lam ni nga ai rai nna, Y12 nbungli hte shani shagu kinyu sa yu ai lam ni, Laknak kaba gap shapyen bun ai lam ni ding yang matut galaw taw nga ai hpe chye lu ai re.
Mali Hka lam makau hku na htu shadut htim gasat lung wa ai myen hpyen hpung ni gaw, ya ten Katha lawu, Yin Koi Taung (ရင်ကွဲတောင်) shara hta du nga sai lam chye lu ai.
Myen hpyen dap ni du nga ai Yin Koi Taung shara gaw, hpyen masa lam hta ahkyak ai shara langai re zawn, Katha Indaw ginra ni de sa ai lam numbraw shara langai re lam mung chye lu ai.
Myen Hpyen maga na gaw, n dai lanam rai n shang ai laman Mali Hka lam yawng hpe up madu lu hkra shakut taw nga ai lam re nga, hpyen masa yu maram ai ni tsun da ai re.
