Myen Hpyen dap madu ai MRTV Shiga hta dai ni kaw na Myitkyina Putao Nbungli pyen ai lam hpe bai galaw sana lam n dau ai rai tim, kaja tatut hta gaw, nbungli lekmat dut ya ai lam n nga ai sha n ga, nbungli pyen ai lam mung rai n nga ai nga, Nbungli pa na lit nga ai ni tsun ai re.
“Mung shawa ni gaw, MRTV kaw na nan shapoi ai re majaw kaja teng sam ai nga grai san wa ma ai, rai tim anhte hpe nbungli lekmat dut na matu hpa n shana wa ai, hpaw sai lam mung n tsun ai, Nbungli Pa na chyinghka kaba ni mung she naw pat da ma ai,” nga tsun dan wa ai re.
Ya na zawn hkrun lam hkawm Mung Shawa nbungli pyen ai lam n nga mat ai rai tim, Hpyen nbungli Y12 hte htaw gahkrang ya ai lam ni nga ai hpe sagawn chye lu ai.
Myitkyina Nbungli pa hta lai was ai shata kaw Drone bawm sa jahkrat bun ai nga nna, Nbungli Pa n ta n tsa kaw Jummer shakap ai lam, Nbungli pa shawng na Mawdaw tawn shara hkan Pipe sumri shakap ai ni galaw taw ai hpe Jinghpaw Mungdaw Asuya Facebook shiga hta mu lu ai re.
Myitkyina Putao Nbungli pyen na lam the seng na, dai ni ten du hkra gaw, galoi gara shani kaw na pyen na ngu hpe a tsawm tup hkrak n chye lu shi ai re.
Ya na zawn, Jinghpaw mung de Nbungli n pyen mat ai gaw, Nbungli jaksau mayak a majaw re nga, mung masa yu maram ai ni tsun da ai re.
