Thai Mungdan kaw galaw ai Mungkan Hka Nhtoi (World Water Day) Lamang hta Jinghpaw Mung a shingra lam hpe mung Sa Htawng Madun dan ai lam galaw wa ai lam chye lu ai.
Ndai hpawng lamang hta Shang lawm htawng madun ai lam hte seng nna, dai lamang hpe hkyen lajang woi ai Shd Naw Naw gaw n dai zawn tsun ai re.
“Madung yaw shada ai gaw, anhte Jinghpaw mung kaw mung nhprang htu ai majaw, kashi hka wam ni n san seng ai hpe yawng chye lu nna, dai hpe shading sharai wa lu na hpe yaw shada let galaw ai re,” nga tsun dan wa ai re.
Myen Mung hte Thai Mungdan Jarit kaw Nhprang htu shaw ai lam hpe ninghkap ai hku na Mungkan Hka Nhtoi (World Water Day) hpe Chaingrai Muklum na, Wat Fang Min hte Kok Hka shi makau kaw March 22 ya shani galaw wa ai re.
Ndai lamang hta Chaingrai Ginwang na Uphkang Du hte Party ninghpum Salang ni, CSO Wuhpung wuhpawng hte Chaingrai Dakkasu na jawngma ni, makau grup yin hkan na htunghking Salang ni sa du shagrau shang lawm wa ai hpe mu mada lu ai re.
Dai hpawng lamang hta Htunghking Kahkrang, Hka Sanseng na matu tara shadik shatup ai lam, Htunghking Malu masha gatdut Poi lamang hte, Makau grup yin Shingra hkaw tsun hpawng, Shingra Makawp maga lam hte seng ai Madun gawk lamang ni hte galaw wa ai re.
Ndai hpawng lamang hta, Thai Mungdan du Jinghpaw ramma ni mung shang lawm wa ai rai nna, Jinghpaw Mung Sut Nhprang htu ai majaw, Hka nsan seng mat ai lam ni hpe sa htawng madun ai lam ni galaw wa ai hpe mu lu ai re.
Myen Mung kata Hka Nhprang htu shaw ai lam a majaw, Hkashi Hkanu hkan na Hka ni hten za ma ai lam the seng na, Karenni na amyu shayi langai mung n dai zawn matut tsun dan da ai re.
“Myen Mung kata sut nhprang htu shaw ai lam the seng na hpa galaw na nga tim, ginra madu ni hte bawng jahkrup ai lam n galaw ai sha, ahkang aya nga ai ni hte gumhpraw lu ai Company ni hkrai yawng ka-up madu kau ma ai, dai zawn nbyin ging ai lam rai nga ai. Myen mung na hka shi ni gaw sut n hprang htu na hten za ma sai.” Nga tsun ai re.
Thai Mungdan kata Hkashi hkanu san seng san pan lam the seng nna, hkaw tsun madun ai hpawng lamang galaw wa ai rai nga ai, dai galaw lamang hta mung shawa 1000 ram sa du shang lawm wa ai hpe chye lu ai re.
