Mogok hte Mungmyit kaw nga ai PDF ni hpe yen na matu TNLA dip n-gun Jaw hkrum nga
Kokang the Balawng TNLA gap hkat jahkring myit hkrum lam la wa ai hpang, TNLA a jinghku rawt malan hpung ni nga ai ginra hkan na PDF dap ni hpe yen shangun na matu dip n-gun jaw wa ai nga PDF hte ni nawn ai ni tsun ai re.
Mogok muklum a sinna maga de, dung da ai PDF Pawng hpawm dap yawng hpe ndai shata 22 ya shani kaw na yen shangun taw ai lam PDF the ni nawn ai Salang langai ndai zawn tsun dan wa ai re.
“Ya gaw Kokang hte Balawng ni gap hkat jahkring sai re nga yang gaw, mi Balawng ni hpe garum na nga ai PDF ni hpe mung gau sai gaw, dai grup yin kaw nga ai PDF ni hpe ndai shata 22 hpang jahtum yen ngu tsun da ma ai da,” nga tsun dan wa ai re.
Miwa gaw NUG hpe n hkap la ai re majaw, Kutkai ginra hpe Kokang ni zing madu kau sai majaw, PDF ni hpe mung gawt shapraw wa ai masa re lam matut tsun dan da ai re.
Mogok hte Mungmyit ginra hpe Balawng TNLA the Myen Hpyen dap gap hkat jahkring myit hkrum wa ai hpang, Myen Hpyen lata de ap kau na matu myithkrum wa ai hpang, NUG n pu Mungshawa Makawp maga dap PDF ni matut litla da na lam n dau wa ai re.
PDF pawng dap ni Mogok the Mungmyit ginra makau grup yin matut shara la da ai majaw, NUG n pu PDF the Myen Hpyen dap lapran jahkring hkring gap gasat hkat ai lam ni byin nga ai re.
Dai ginra ni hpe Balawng TNLA the PDF pawng hpawm dap ni jawm htim gasat zing da ai ginra mayan mung rai nga ai.
Ya na zawn pawng hpawm nna jawm htim gasat zing da ai shara ni hpe Kokang MNDAA the Balawng TNLA ni gap hkat jahkring wa ai hpang, PDF dap ni hpe ya na zawn kalang bai dip n gun jaw hkrum wa ai lam mung rai nga ai.
PDF dap hpe TNLA maga dip n-gun jaw wa ai ngu gaw, Miwa a majaw re nga mung masa yu maram ai ni tsun ai re.
