Waimaw de ndai laman Myen ni hpyen n-gun kaba the bai htu wa ai majaw, shani shagu majan bai byin taw ai lam chye lu ai.
Waimaw (58) Myen Hpyendap shingdu langu sun grup yin de March 22 ya shani kaw na laja lana bai gap gasat wa ai majaw, Myitkyina hkran maga na mung, laknak kaba shani tup gap bun ai lam ni galaw wa ai nga, Myikyina ginra amyu shayi langai KNG shiga de n dai zawn tsun dan ai re.
“Waimaw de bai gap hkat taw sam ai, Ning kaw na Ding! She nga bai gap shapraw taw sai, Lekung Balik dap kaw nan laknak kaba shadun na gap taw sam ma ai, n ta she kanan ai mi gaw,” nga tsun ai re.
Myitkyina kaw na laknak kaba nau gap bun ai majaw, Mung shawa ni hkrit kajawng let, nga taw ai lam matut tsun dan ai re.
Waimaw Mungna မှန်ပြတောင် kaw dung ai Myen Hpyen laknak kaba dap ni Waimaw Wuyan, Mukchyik maga ni de lai wa sai bat kaw na laknak kaba bai gap bun ai hpang, lagaw dap hte htu yu ai rai tim, n lu htu ai majaw, Myitkyina hkran maga na mung laknak kaba the laja lana bai gap gasat wa ai masa re lam, hpyen masa yu maram ai ni tsun ai re.
Lai wa sai Shata kaw KIO the Miwa Asuya lapran hkrum jahta ai hta, Miwa tsun ai lam hpe KIO maga n hkap la ai majaw, ya na zawn, Hpyen masa hku na bai dip n gun jaw wa ai masa mai byin ai nga, hpyen masa yu maram ai ni tsun da ai re.
Ndai lam hpe maram yu yang, Myen Hpyen dap gaw, Waimaw Kanpaiti lam kaba hpe lu hkra bai la na matu shakut taw ai masa re majaw, Kaipaiti lam kaba n tsa mayan hta Majan kaba byin wa na masa nga ai lam, hpyen masa yu maram ai ni matut tsun da ai re.
Mani Laban ya shani kaw na Jinghpaw mung de shang ai ahkyak ai kawng lam hka lam na mare kaba rai nga ai Katha muklum hpe KIA PDF pawng hpawm dap maga na bai htim gasat ai majaw, majan laja lana matut byin taw sai lam shawng hpyen magam gun ni kaw na chye lu ai re.
Myen Hpyen Dap Asuya Nnan hpaw ngut ai hpang, Jinghpaw mung de hpyen masa grau bai shaja hkat wa na masa nga ai lam, Hpyen masa yu maram ai ni tsun da ai re.
