Kutkai mare hpe Miwa Kokang MNDAA ni gasat zing kau ai hpang, Kutkai Pa na Balawng TNLA ni jai lang wa ai Rung ni yawng hpe hkan gasawk jep nna, arung arai yawng hpe mung jahten kau ya ai lam ni galaw wa ai nga ginra mash ani tsun dan ai kaw na chye lu ai.
Kutkai Pa kaw TNLA the Mandalay Tsi Dakkasu na CDM magam gun ni hte jawm hpaw da ai, Tsi Jawng langai na arung arai ni yawng hpe Kokang MNDAA dap ni sa jahten amya kau ya ai lam ni galaw wa ai nga, ginra masha langai KNG shiga dap de ndai zawn tsun dan da ai re.
“Kutkai kaw PSLF hte Mandalay Tsi Jawng na CDM magam gun ni jawm hpaw da ai tsi jawng re. dai hpe Kokang ni gasat zing kau ai hpang, Kutkai na TNLA the seng ai rung sha n ga, Tsi jawng ni du hkra yawng hkan gasawk amya kau ma ya ai, arai ni yawng hpe mung shinggan de magawn shapraw kau ya ai lam ni galaw wa ai,” nga tsun dan ai re.
Kutkai pa na PSLF, TNLA the seng ai Rung ni yawng na dawnghkawn hkan shayu ai sha n ga, pyendau ni yawng mung hkan shaprai kau ma ya ai hpe mu lu ai re.
Dai tsi jawng gaw Mandalay Tsi jawng na CDM magam gun ni hte Myen Mung tingna Tsi magam gun CDM ni jawm hpaw da ai, Collage madang re ai Tsi jawng langai re lam chye lu ai.
Dai Tsi jawng hpe n shang chying lau shi yang, dai kaw na rung rai ni yawng hpe shinggan de shaw da nna, ra ai ni sa lu mu ngu na tsun ndau ai lam ni galaw wa ai nga, ginra masha ni tsun ai re.
Miwa Kokang ni maga na mung, Tsi Jawng zawn re ni hpe gaw dai zawn n galaw ging ai nga, ginra masha ni tsun maram da ai re.
Ya na zawn Jinghku rawt malan shada lapran kaw n dai daram sawng hkra galaw ai lam gaw, Laukgai bawngban hpawng kaw shada n hkrum n ra re ai majaw masa re nga, ginra masha langai KNG de tsun maram tawn ai re.
