Nawnglut Ginwang Dung (26) ginra na ahkyak ai Myen Hpyen dap shara lahkawng hpe KIA PDF dap maga gasat zing madu kau lu sai nga shawng lam hpyen magam gun the ni nawn ai ni tsun ai re.
Indawgyi ginra Lung Tung hte Let Pan lam numshe shara na Sam Hkyeng SNA the Myen ni pawng dung ai shara hpe KIA pawng hpawm dap maga March 14 ya shani gasat zing kau sai nga KIA hte ni nawn ai ginra amyu shayi langai KNG de ndai zawn tsun dan wa ai re.
“Anhte Mung shawa ni gaw kabu ra na kun? Lungtung na Myen hpyen dap lahkawng hpe gaw bai lu zing kau sai nga Salang kaba langai wa tsun dan ai le. Anhte mung dai kaw n nga taw ai majaw kam ra na kun? N kam ra na kun. n chye ai le.” Nga tsun dan wa ai re.
Mai Nawng, Lung Tung mare hkan na Hpyen yen mung shawa ni law malawng gaw, Tamahkan de hprawng yen taw nga ai re lam chye lu ai.
Ginra mung shawa ni dai shara lahkawng gasat zing la lu wa ai nga tsun ai rai tim, KNG maga lit nga ai Hpyen magam gun ni hpe san shateng lu ai lam n nga ai re.
