Kutkai Pa Hpe Kokang MNDAA htim gasat zing madu kau ngut ai hpang, Kokang MNDAA the Balawng TNLA Ginjaw tsang na Salang ni Kokang Ginra Laukgai kaw hkrum jahta ai hpang, Gap hkat gan jahkring myit hkrum sai lam chye lu ai.
Miwa Asuya datkasa Deng Xijun Naypyidaw kaw du ai hpang, Kokang ni Kutkai hte Muse Pyihtaungsu lam kaba mayan na Balawng dap shara yawng hpe htim gasat kau ya wa ai rai nga ai.
Muse Lashio Pyihtaungsu lam kaba hpe Kokang ni yawng gasat zing madu kau ngut ai hpang, Kokang hte Balawng gap hkat jahkring Myit hkrum lam lu wa sai nga dai ginra na mung shawa langai n dai zawn KNG de ndai zawn tsun dan wa ai re.
“Gap hkat jahkring Myithkrum masai da. Lawng lam (5) jawm myit hkrum ai nga tsun ai. Aten du jang ndau wa na mara ai.”
Dai gap hkat jahkring myit hkrum ai lam hta lawng lam (5) hpe jawm myit hkrum wa ai lam chye lu ai.
Dai lawng lam (5) gaw, gap hkat jahkring da ai laman, 1. mangut manghkang lam ni hpe laknak hte n hparan na, 2. Kutkai hpe Kokang MNDAA Dap langai sha Uphkang na lam, 3. Kokang maga rim da ai Balawng Hpyenla 100 jan hpe bai dat ya na lam, 4. Jinghku Rawt malan hku matut masat shagrin nna, Jinghku rawt malan hpung hku na matut grin nga na lam, 5. Uphkang ginra ni hpe bai jawm masat shagrin na, n dai lawng lam (5) hpe jawm myit hkrum wa ai hpe chye lu ai.
Ndai zawn ginjaw madang hkrum jahta bawngban wa lu hkra, lapran Salang tai ya ai gaw, Rakhaing AA dap ni re lam chye lu ai.
Kokang ni Muse- Lashio Pyihtaungsu lam kaba n tsa na Balawng dap ni yawng hpe htim gasat zing madu kau ngut ai hpang, Nam Hkam hpe bai gasat na lam shiga ni pru wa ai rai tim, Nam Hkam, Namhpakka ginra ni de gaw gap gasat hkat ai lam ni n nga wa ai re.
Muse Lashio Pyihtaungsu lam kaba n tsa na Namhpakka Mare hte Mungbaw Hka mahkrai shara ni hta KIA matut shara la da ai rai tim, Shagyit hku na dung ai lam gaw n nga sai hpe chye lu ai.
Kokang gaw, Miwa a masha re majaw gaw, Mawdaw lam kaba n tsa nga ai rawt malan hpung ni yawng yen mat hkra gaw, Kokang ni galaw wa na masa nga ai lam hpyen masa Mung masa yu maram ai Salang langai KNG de n dai zawn tsun maram da ai re.
“Ya madung gaw, Myen Mung hte Miwa mung lapran madung Sut hpaga ginlen nga ai Pyihtaungsu lam kaba hpe Miwa ni hkrai jum tek mayu ai majaw, lam kaba n tsa nga ai rawt malan hpung yawng hpe shachyut kau shangun wa ai rai nga ai, ya dai lam kaba n tsa na Shanglawt the SSPP hpe mung she n gau kau na i?” nga tsun maram da ai re.
Pyihtaungsu lam kaba n tsa na Balawng TNLA dap ni hpe gap gasat ai zawn KIA hpe gaw gap gasat na n re nga ginra masha ni tsun maram ai re.
Pyihtaungsu lam kaba n tsa na Balawng Dap shara ni hpe gaw, kaning n chyum Miwa Asuya a ga madat ra ai majaw gasat wa ai rai tim, KIA hpe gaw gasat na n re lam matut tsun ai.
Hpung Kya Shin woi awn ai Kokang MNDAA ni hpe 2009 ning Myen Hpyen dap gasat shachyut kau ma ai hpang, dai ten na KIA Dap Awn Daju Dukaba Gunhtang Gam Shawng shi nan litla nna, Kokang ni hpe Nmau Hka Sinna hkran maga, KIA Dung (2) Ginra Namjawn,Namtawng ginra ni hta shara jaw nga shangun wa ai lam, Mung masa la ni tsun ai re.
Kokang hte KIA gaw lai sai shaning ten law law kaw na prinem mahkri shawn ai jinghku laknak lang rawt malan hpung re majaw gaw, gara hku tim KIA hpe gaw hkra na n re lam tsun ai re.
Namhpakka ginra masha lam the seng nna, Namhpakka Uphkang rung kaw na mung shawa ni sadi maja na lam, Mani March 16 ya n htoi hte laika langai shapraw da ai re.
Dai laika hta ya byin taw ai masa lam hta hkan nna, mung shawa ni sadi maja na lawng lam 6 hpe n dau dat ai re.
Dai lawng lam 6 gaw, Shana hkying 8 htu ai hpang, shinggan de pru hkawm ai lam n galaw lu na lam, hkrun lam galu hkawm ai lam hte Yisun hkauna sa ai lam ni hta sadi na lam, Mung Shawa ni hpyen hking hpun na hkawm sa ai lam n galaw na lam, Ra ahkyak machyi kaba hkrum na hkrunlam hkawm ra yang seng ang ai Uphkang rung ni de tsun shana na hkawm sa na matu, N’ta shagu ga gaduk n hkun htu na shim lam hkyen shajin da na lam ni rai nga ai.
Pyihtaungsu lam kaba yawng hpe Kokang ni gasat zing kau ngut ai hpang, Muse Lashio Mandalay hpaga gunrai lam kaba hpaw sai lam Myen Hpyen Telegram shiga ni hta tsun garu nga ai hpe mu lu ai re.
Hpyen masa naw shuk shanuk hkat nga ai ten, Mung Shawa ni hku nag rai wa ra ahkyak na sha n rai yang, hkrun lam galu hkawm ai lam hpe n galaw na matu lit nga ai ni hku na tsun sadi jaw da ai re.
