Hpakant Mawsi Za Sky Hotel makau kaw Bawm kapaw la ai majaw, Masha langai yawng ayai mat hkra si hkrum mat ai lam ginra masha ni tsun ai re.
Dai bawm kapaw ai hpang, shan hkyep ni yawng ayai mat ai majaw, hkyep htep yan mi sha mu mat nna, laga shan hkyep ni yawng kamawng ayai mat ai lam, garum kahtau hpung lit nga ai Salang langai ndai zawn tsun dan da ai re.
“Gadai galoi sa hkam da ai re n chye ai, dai lam hku gaw, Mung shawa ni ayen na lai ai Myen ni mung jahkring hkring hpyen shamu shamawt na lai ai lam re, dai ya kapaw la ai wa gaw kaning rai na kapaw la ai kun a tsawm gaw n chye ai, shan hkyep ni yawng kamawng ayai mat ai, hta la pyi yak ai,” nga tsun dan wa ai re.
Dai Si hkrum ai wa a shan hkyep ayai taw ai ni hpe garum kahtau hpung ni sa hta nna, lam makau yawng hka hte kashin shatsai kau ai lam ni galaw ai nga matut tsun dan wa ai re.
Sky Hotel shawng hku Myen hpyen dap ni jahkring hkring lai ai majaw, laknak lang wuhpung maga bawm hkam ai lam ni jahkring hkring galaw wa yu ai shara re lam chye lu ai.
Dai zawn laknak lang wunpung ni hkam da ai bawm hpe, Kani ya ni sa raw nna, Myen Hpyen dap hpe bai dut jaw ai mabyin lam ni mung nga ai hpe chye lu ai.
Ndai kalang kapaw hkrum ai gaw, gadai gara maga na hkam na, kaning zawn rai kapaw la ai ngu hpe gaw a tsawm tup hkrak n chye lu ai re.
Mani March 16 ya shani hta sha, mung shawa la langai Sengke the mawdaw adawt hkrum nna si hkru wa ai lam nga ai hpe chye lu ai re.
Dai mabyin lam gaw, Lawnghkang kaw na Hpakant de lung wa ai Pajero mawdaw langai hpe hpang kaw na mawdaw langai the hkan gap ai majaw, hprawng gawt dumbre nga ai kaw, dai sengke the adawt hkat hkrum ai majaw, Sengke gau ai la si hkrum wa ai re hpe chye lu ai re.
Dai Mawdaw adawt hkrum na si ai Sengke la wa gaw, asak 44 ning re ai Ko Naing Lin ngu ai wa rai nna, ရတနာရောင်ခြည်ကုမ္ပဏီ kaw bungli galaw ai wa re lam chye lu ai.
