Myitkyina Rambu lawk hta Kani ya ni tsi htu samyit ni hpe hkrup mara kabai ai majaw, dai kaw nga ai mung shawa ni hkawm sa hkawm wa lam hta myit tsang let hkawm sa taw ra ai lam, dai lawk na mung shawa ni tsun ai re.
Ya na zawn mung shawa ni myit tsang ai lam gaw, dai kaw nga ai Kani ya ni lang da ngut sai tsi htu samyit ni hpe lam n tsa hkrup mara kabai ai sha n ga, ma ni ginsup chyai ai lam makau shara hkan kabai ai majaw, mung shawa ni myit tsang ai re lam dai lawk na mung shawa langai KNG shiga de n dai zawn tsun dan ai re.
“Kani ya ni tsi htu samyit lang ngut nna dai hku lam makau hkan kabai da ai, shan the kabai da ai shara hkan gaw ma ni ginsup chyai ai shara ni le, Ma ni a matu grai hkrit tsang hpa rai nga ai. Lang ngut sai tsi htu samyit ni hpe shi shara hte shi a tsawm chye kabai ai rai yang gaw naw tsamai na wa, ya gaw mala la nan sawng ai,” nga tsun dan ai re.
Dai kani ya law malawng kaw gaw, ana zingli kanu kap ai ni re majaw, dai samyit sa hta hkrup kabye ju la sai kaw na gaw n loi sai dai majaw grai hkrit ai nga, matut tsun ai re.
Lai wa sai shaning hkan wuhpung n kau samyit hkan hta ai lam galaw ai rai tim, dai ning hkan na gaw, dai zawn hkan hta ai lam ni n nga mat sai hpe chye lu ai re.
Gadai n hkan hta ya mat ai majaw, mare lawk na mung shawa ni tinang dang di dang dep ai hku na hkan hta jasan ai lam ni galaw taw ai re lam chye lu ai.
Jinghpaw mung daru magam zing kau ai hpang, Kani lu sha ai masha dut mari ai masha lani hte lani grau grau law jat wa ai sha n ga, hpaida dabang ni mung grau law jat wa taw nga ai re.
Dai zawn, Kani dut mari lu sha ai lam hte hpaida dabang ni law wa ai majaw, kashun kashe lagu lagut damya mya ai lam ni mung grau law jat wa ai hpe mu mada lu ai nga, ginra masha ni tsun maram da ai re.
