Gumshem Myen Hpyen dap masu hkalem ai ra lata poi na lung wa ai, n tara ai amyusha rapdaw datkasa hpawng hpe dai ni March 16 ya shani kaw na Naypyidaw hta hpawng hpang taw sai lam, Myen hpyen shiga lawk ni hta tsun n dau da ai re.
Dai hpawng lamang hta Rapdaw ningbaw hpe lata san na matu Tingnyang Up lit hpe Hpawmi Nbrang Doi Bu woi awn galaw wa ai hpe mu lu ai re.
Rapdaw hpawng lamang galaw ai hta, amyusha rapdaw ningbaw hpe USDP Party Ningbaw Slg Hkin Yi hpe lata san wa ai lam chye lu ai.
Ningtau amyusha rapdaw dat kasa ningbaw gaw, ya ten na ပြန်ကြားရေးဝန်ကြီး ဦးမောင်မောင်အုန်း hpe jawm lata san wa ma ai lam chye lu ai re.
2020 ning ra lata poi hpe n rap ra ai, Sinda pan lagu ai ngu mara shagun masu na 2021 ning February kaw daru magam ahkang aya yawng Myen Hpyen dap zing kau ai re.
Party ningbaw Salang Hkin Yi lata san hkrum sai majaw, ahkang aya lu ai Party maga na gaw, gumsan magam lung wa na lam n nga sai lam mung masa yu maram ai ni tsun da ai re.
Mung Shawa rapdaw kaw, ya na Myen Hpyen Dukaba marai 10 jan shang lawm taw nga ai mung rai nga ai.
Dai ni March 16 ya shani Mung Shawa rapdaw hpawng lamang hpe galaw nna, Amyu Sha rap daw hpawng hpe gaw, 18 ya shani galaw na matu hkyen shajin da ai re.
Mung Shara rapdaw hte Amyu sha rap daw hpawng lahkawng ngut ai hpang, Pyihtaungsu Hluttdaw hpawng lamang shaga nna, dai Pyihtaungsu Hlutdaw kaw Gumsan Magam lata sa wa na rai nga ai.
2008 gaw da ai tara kanu kaw mahta nna, rapdaw datkasa marai 3 litla gun hpai wa yu sai re. 2010 ning ra lata poi hta gaw, dai ten na Myen Hpyen Dukaba ဗိုလ်ချူပ်ကြီး သူရဦးရွှေမန်း galaw wa nna, 2015 ning ra lata poi hta gaw, NLD Party bai dang wa ai majaw, Salang Win Myint lit la wa ai re.
Salang Win Myit Gumsan magam de bai lung mat ai majaw, shi shara hta, Slg Tangbau Hkun Myat hpe amyusha rapdaw ningbaw lit bai shatsam wa ai rai nga ai.
