Sinhkan Mahkai Lahta Nan Hkuk mare Malihka n tsa Jahtu Hpawng kaw Nbungli Bawm Jahkrat bun

Manmaw Ginwang, Sinhkan mahkrai lahta Nan Hkuk, Bo Taung, Myalay Mali Hka kau mayan Ja htu sha taw ai Mung Shawa ni hpe lai wa sai nhtoi 3 ya laman Myen Hpyen Jet nbungli bawm wa jahkrat bun ai majaw mung shawa yawm dik marai 50 a lahta si hkrum wa ai re.

March praw 10 ya shana maga hkying 3, aten daram hta Y-12 Nbungli the shawng pyen gayin nna, Jet Nbungli 3 the bawm wa jahkrat bun kau da ai lam chye lu ai.

Dai mayan hta ndai laman hpa majan byin ai lam mung n nga ai rai tim, Myen hpyen maga mung shawa ni galaw lu galaw sha nga ai shara hpe da sang shading na wa gap ai masa re lam Dukaba Naw Bu tsun ai re.

Hpa majaw Mung Shawa ni galaw sha taw ai shara hpe bawm wa jahkrat bun ai kun? Ndai lam the seng na Dukaba Nhpang Naw Bu KNG Shiga de n dai zawn tsun dan da ai re.

“Sinhkan mahkrai lahta Nan Hkuk mare Malihka n tsa ja htu taw ai ni hpe jahkrat bun ai re nga, dai sha naw na ai. Mare Mung shawa ni gaw hkala na re, rai tim gade ram gara hku hkala ai ngu jahpan hpe gaw tup hkrak n chye shi ai. Myen ni Mung shawa hpe hpa rai gap ai ngu htang maram na grai yak wa ai le, aten tup mung shawa ni hpe gap taw ai majaw, hpyen wa hpe gap ai ngu gaw nau pyi n nga ten tut Mung Shawa hpe gap ai hkrai she law ai, Ja htu sha shara re nga yang gaw KIO a shang gumhpraw nga ai shara re ngu masat shading na gap ai gaw she n rai i?” nga tsun dan wa ai re.

Nbungli bawm a majaw, Mali Hka n tsa ja htu taw ai jak hpawng 10 jan wan hkru hten lawm mat nna, Masha 40 hte 50 lapran ram gaw yawm dik si ai masa re lam ginra masha ni tsun ai.

Ya ten du hkra dai shara grup yin kaw Nbungli jahkring hkring naw sa du pyen gayin taw ai majaw, Hkyen mawoi garum kahtau ai lam hpe a tsawm tup hkrak rai n lu galaw ai majaw, Si hkala ai jahpan hpe chye lu na matu yak taw ai lam matut chye lu ai.

Ya ten na dai ginra na Hkye mawoi magam bungli lam hte seng na, dai ginra na magam gun langai tsun dan ai gaw,

“Si Hkala ai lam the seng nna gaw, a tsawm rai n lu shaw la shi taw nga ai, n kau gaw hka de lup si mat ai ni nga ai majaw, gade daram si ai ngu hpe a tsawm tup hkrak chye lu na naw yak taw nga ai,” nga tsun dan ai re.

Ya Nbungli Bawm wa jahkrat ai shara gaw, Manmaw hte Jehkam mare lapran kaw rai nna, dai grup yin ni hta Mung Shawa ni hkrai Ja Htu sha ai shara re lam chye lu ai.

Nbungli bawm wa jahkrat ai shara gaw, Manmaw de hpyen n-gun lusha shani shagu wa htaw sa ai, nbungli lam mung re lam, ginra mung shawa langai n dai zawn tsun dan ai re.

“Anhte Myalay mare gaw lani mi hta nbungli gade lang mung da bat na lai ai, galoi gaw gara de sa jahkrat ngu hpe maram na matu pyi yak ai, Y12 gaw shani shagu ngu na pyen ai gaw, Manmaw de lusha wa jahkrat ai she n rai i? dai majaw anhte gaw nbungli wa sai ngu na maja ga nga yang,  ndang maja ai. Shani shagu pyen taw ai re majaw,” nga tsun ai re.

Myen Hpyen dap gaw, n dai laman majan byin ai lam n nga ai ginra hkan mung nbungli bawm jahkring hkring sa jahkrat bun nga ai majaw, Mung Shawa ni hku na mung, Majan nbyin ai majaw nga na, Myit mu tem si n nga na matu Dukaba Naw Bu tsun shadum da ai re.

Myen Hpyen dap gaw, Mali Hka lam mayan hpe  bai gasat zing madu la lu na matu Mali hka lam mayan hpe ya na zawn nbungli bawm jahkring hkring hkan jahkrat bun taw ai mung rai nga ai.

Lai wa sai lahkawng ya ram hta mung Mali hka kau na Dagawng mare kaba hpe htim gasat zing ngut ai hpang, Hti Chyaik muklum hpe 3 ya tup nbungli bawm wa jahkrat bun wa ai re.

Myen Hpyen dap gaw, Mali hka lam yawng hpe lu zing madu hkra n dai laman hpyen masa grau shaja wa na masa nga ai lam, Hpyen masa yu maram ai ni tsun da ai re.