Kutkai kaw Kokang MNDAA hte Balawng TNLA Gap Hkat Wa Na Masa Byin Nga
Kutkai Pa hta ndai laman Kokang MNDAA the Balawng TNLA dap ni hpyen masa grau grau shaja hkat wa taw ai nga ginra masha ni tsun ai re.
Ndai laman Kokang dap ni gaw, Kutkai Pa hpe hpyen n gun kaba hte dip n gun jaw taw ai zawn, Sinpraw hkran maga na Balawng dap ni yawng hpe yen ya na matu hpyi shawn da ai lam nga ai rai nna, TNLA maga na mung n lu yen ya ai nga bai tsun n htang da ai lam nga ai hpe sagawn chye lu ai.
Ya na zawn Balawng maga n yen ya ai rai yang, dai ginra hta Balawng hte Kokang majan byin wa na masa nga ai lam ginra masha langai KNG de n dai zawn tsun maram da ai re.
“Miwa ni hpyen n gun grai jat wa taw nga ai, shawoi Balawng TNLA ni dap jung da ai shara hpe mung yen ya u nga, Balawng maga na ni mung Kutkai gaw anhte gasat zing da ai she re bai nga, shada grai n hkrum wa ai hpe yu yang laklai wa na masa gaw nga ai,” nga tsun dan wa ai re.
Ya ten Kutkai pa hta jak sau dumhprut nna, gunrai malu masha yak wa ai ten, Kokang dap maga Hpyen n gun, Drone laknak n gun kaba ni the dip n gun jaw taw ai lam rai nga ai.
Kutkai hta mi kaw na Kutkai Pyithutsit ngu na nga taw ai, Miwa ni gaw Kokang MNDAA dap de shang mat nna, ya ten dai Pyithutsit ni Kutkai Pa hta shara bai la mayu wa ai majaw, Balawng hpe jahte tam wa ai masa mung mai bai ai nga, n tsa na salang wa matut tsun maram da ai re.
Ya ten Kokang dap maga Balawng Up hkang ginra de shang ai ai gunrai lam ni yawng hpe pat da ai majaw, Balawng Uphkang ginra nga ai Mung shawa ni lam shagu yak hkak taw nga ai lam ginra masha ni tsun ai re.
