Myen Hpyen dap n dai laman KIA PDF dap ni Up madu ai ginra hkan na Sau Ginlen dabang hte Ja htu ai Jak Hpawng ni hpe shading na bawm hkan jahkrat ai lam ni glaw taw ai lam shawng lam hpyen magam gun ni kaw na chye lu ai.
March 10 ya shana Hkying 4 aten daram hta, Mandalay Tada Oo na rawt lung wa ai Jet Nbungli langai Je Hkam Mahkrai lahta ဘူးတောင် hte နန့်ခုတ် mare lapran Ja htu taw ai, Ja Hpawng n tsa kaw wa jahkrat bun ai lam ginra masha the ni nawn ai ni n dai zawn tsun ai re.
“Nbungli Bawm wa jahkrat ai majaw, Mya Lay mare htawra hkran ja hpawng 5 kaw wa hkrat ai, dai kaw bungli galaw ai langai sha lawt ai, si ai masha ya lu hta da ai marai 30 ram rai sai, Si ai the Hkala ai yawng pawng yang marai 100 daram nga na re,” nga tsun dan ai re.
Myen Hpyen Nbungli bawm wa jahkrat ai shara gaw, KIA ja htu ahkang pat hkum tawn ai shara rai nna, Myen Hpyen Balik ni kaw hkawn kang bang na htu sha taw ai Ja Hpawng ni re lam chye lu ai.
Lai wa sai bat hta mung, Sagaing lahta daw Hummalin Hpawng Pyin ginra na Sau ginlen shara hpe Nbungli bawm wa jahkrat bun ai majaw, Sau htaw mawdaw law malawng wan hkru mat nna, Mung Shawa si hkala lam ni byin wa ai re.
Ndai laman Myen Hpyen dap gaw, dai zawn mung shawa galaw lu galaw sha ai, shara ni hpe sha-ang nna Nbungli bawm hkan jahkrat bun taw ai mung rai nga ai.
Myitkyina Mandalay Yangon Nbungli lam pat mat ai hpang, Myen Hpyen dap gaw, Hpyen Nbungli hpe jai lang let, Hkrun lam hkawm mung shawa ni hpe htaw gahkrang ya taw ai lam, Shanglawt Kaichyan shiga lawk kaw na chye lu ai re.
