Hpakant Mashi Kahtawng Kyuhpyi Bum Grup yin de dai ni mung Majan laja lana matut gap gasat hkat taw nga ai nga, Ginra masha ni kaw na chye lu ai.
Ndai laman Ma ni jawng dat sai re majaw gaw, Majan matut nna grau laja wa na masa nga ai lam ginra amyu shayi langai KNG Shiga de n dai zawn tsun ai re.
“Ya gaw Ma ni mung Jawng dat sai re nga yang gaw, Majan gaw grau laja wa na re, Myen ni mung n lu n da gasat wa rai yang gaw, hten za ai lam law nna, Majan chyinghkraw galu wa na masa nga ai,” nga tsun dan ai re.
Myen Hpyen dap maga laknak kaba nau gap sharu bun ai majaw, Mashi Kahtawng gaw nga n mai ai madang du mat sai lam, matut tsun dan ai re.
Mashi Kahtawng Kyuhpyi bum hpe htim gasat ai hta, Madung Pyithutsit ni hpe shawng lam de lung na htim gasat shangun taw ai masa lam re nga tsun ai re.
Myen Hpyen ni Hpakant Mashi Kahtawng Kyuhpyi bum hpe htim gasat taw ai ya Shata mi jan hkawt na wa sai rai nna, Mung Shawa dum n ta hkra hten ai lam ni mung law wa taw sai nga tsun dan ai re.
Ndai laman Tsang 12 jawngma ni san poi htai ngut ai hpang gaw, Hpakant de Majan grai bai laja wa na masa nga ai lam ginra masha ni tsun maram taw nga ai re.
Tsang 12 San Poi hpe March shata 11 kaw na 17 ya shani du hkra galaw sa mat na lam Myen Hpyen Hpaji Hkringmang rung na ndau da ai re.
Hpyen Majan Masa a majaw, Hpakant Dakkasu Jawng Shang San Poi htai na Jawngma marai 500 jan hpe Kamaing kaw htai na matu, hkyen shajin taw sai lam sagawn chye lu ai re.
Kamaing de Dakkasu Jawng Shang San Poi sa htai ai Jawngma ni hpe Lusha jarit the laga ra mara na matu marai langai Sen 6 hta ai majaw, Jawngma kanu kawa n kau yak hkak hkrum taw ai lam matut chye lu ai re.
