Hopin Muklum, Myoma Dingda mag ana Myatharyar lawk hta Damya mya nna, Masha marai 6 hpe sat kau da ai amu mang hkang byin lai wa ai lam, ginra masha ni kaw na chye lu ai.
Dai sat hkrum ai hta Ma kaji marai 3 hte hpawn n ta masha marai 5, n ta garum Num hpawmi langai Yawng marai 6 the hpe sat kau da ai lam byin wa ai nga, Ginra masha ni kaw na chye lu ai.
“hkrit na zawn rai, yawng sat sharu kau da ai, dum nta kata na manu dan ai rai ni, hkum kaw lang da ai Ja rai ni yawng la mat ai hpe yu yang, damya sa mya ai masa re,”nga tsun dan ai re.
Damya sa mya ai hta, lata du ni yawng gadoi da ya ai hkang the si taw ai lam chye lu ai.
Dai sat hkrum ai hta asak 40 ning re ai Hpawmi Num 2, La (1), asak 5 Ning the 11 Ning lapran na Ma marai (3) hpe Mana Hkying 11 ram hta sa sat kau da ai hpe, dai hpawt hkying 9 hta she n ta htingbu makau na ni sa mu ai lam chye lu ai.
Ya jun damya mya hkrum ai n ta gaw, gumhpraw arung arai Pawng sha ai dum n ta re lam chye lu ai.
Dai zawn Apawng Seng galaw sha ai hpe Myit n dik na jun damya sa mya ai masa lam mung mai byin ai nga ginra masha ni tsun garu nga ma ai re.
Masha Sat amu mang hkang byin ai n ta hpe seng ang ai Myen Hpyen Asuya na lit nga ai ni yawng sa jep joi nna, si mang yawng hpe mung Tsirung de la mat sai lam chye lu ai.
Myen Mungdan kata Gumshem Myen Hpyen dap daru magam zing kau ai hpang, Hpaida wang the Kani Nang Hpam grau grau law jat wa ai majaw, ya na zawn lagu lagut damya mya ai lam ni mung grau grau sawng wa ai rai nga ai.
