Munggu kaw galaw ai Manau Poi gaw, Kokang Dap ni woi awn galaw ai poi n re ai sha, Chyurum Wunpawng Htunghking hpung kaw na woi galaw ai, Manau Htingnu Dingshawn manau re lam, ginra masha ni tsun ai re.
2026 February 22 kaw na 24 ya shani galaw mat ai rai nna, dai Poi lamang hta, Kokang MNDAA Ginjaw Salang Mr. Li Lao Bao sa du shang lawm nna, Jinghpaw Wunpawng Htunghking Hpung Ginjaw na Salang 2 hte Jinghku Rawt Malan Hpung Rahkaing AA ni mung wa du shang lawm wa ai lam chye lu ai.
Munggu Pa na manau Shadung gaw, lai wa sai 1995 Ning , Mungsa La woi awn ai M.D.A (Munggu Defend Army) Rawt Malan Padang dip wa ai shaloi, Padang manau hpe 1996 ning hta nau lau wa ai shara re lam dai poi kaw shang lawm wa ai, asak 60 ning re ai amyu shayi langai ndai zawn tsun dan ai re.
“Munggu Pa na Manau Shadung gaw, Moi 1995 ning MDA Rawt Malan Padang manau nau lai wa ai shara rai nga ai, Communit zang ayai mat ai hpang, Munggu ginra hpe Yang Mu Leng ni up hkang wa ai, dai hpe n ra sharawng ai dai ginra na Wunpawng Amyu bawsang ni hpe Mungsa La woi gahkyin zinlum la na, MDA rawt malan padang dip padang nau nau wa ai shara re,” nga tsun dan wa ai re.
Munggu ginra hpe Kokang MNDAA, KIA, the laga rawt malan pawng hpawm dap ni 2016 ning hta htim gasat wa yu ai rai tim, awng dang ai lam n lu wa ai re.
Dai hpang, Myen Hpyen dap daru magam zing kau ai hpang, Kya Hpyen Online gumhpraw masu hkalem lam hpe ga baw tawn nna, Kokang MNDAA, Balawng TNLA Rahkaing AA dap ni 1027 Majan masing hpe 2023 ning kaw na htim gasat hpang wa ai rai nga ai.
2023 ning nnan htim gasat hpang wa ai ten, Munggu Hpawng Seng maga hku na htim gasat yu wa ai gaw, Sammung Dingdung daw yawng ngu na ram hpe Jinghku rawt malan hpung ni gasat zing madu la lu wa ai re.
Munggu Hpawng Seng Ginra hpe Kokang MNDAA dap ni 1027 majan masing ten laman nhtoi bat mi ram hte sha gasat zing madu kau wa ai rai nga ai.
Munggu Hpawng Seng Ginra hpe Kokang MNDAA dap ni gasat padang dip kau ai hpang, padang manau nau na matu Kokang ni Jinghpaw Wunpawng Htunghking Hpung ni hpe jahkring hkring sa atet tsun wa ai nga, Munggu na amyu shayi langai KNG shiga de n dai zawn tsun dan wa ai re.
“2023, 2024 ten hkan kaw na shan hte gaw anhte hpe manau na matu sa shadut ai, anhte hku na mung n dai ten nau ai baw n re ngu na ningdang ai, dai hpang maning 2025 ning hta mung bai sa shadut ai, anhte maga na mung Manau nau na rai yang gaw, Manau htingnu ngu ai nga ra ai ngu tsun ai, dai hpang shan the hku na Manau htingnu hpe mung shan the gap ya na nga tsun ai, Manau htingnu ngu hpe jahkring jahkra the loi daw gaw gap ai baw n re ngu na naw ning dang ai, dai hpang shan the lang the lang tsun shadut ai majaw, ninghkap n lu mat na, Manau nau na rai yang, Manau htingnu gaw gap ra ai ngu tsun ai, dan ai shaloi shan hte di dun Miwa gumhpraw Yuan Sen 2 jaw nna, galaw hpang wa ai rai nga ai,” nga tsun dan ai re.
Ndai Manau gaw, Htunghking Hpung ni woi awn ai Manau htingnu ding shawn Poi lamang re ai nga, htunghking Salang ni tsun ai rai tim, Kokang dap maga na gaw, “amyu bawsang ni yawng gaw, n ta masha langai zawn sha, masa lam bung ai amyu sha shada rau jawm nga pra lu na hpe yaw shada let galaw wa ai re nga”, The Kokang Facebook hta tsun tawn ai re.
February 22 kaw na 24 ya shani du hkra galaw mat ai Htunghking htingnu manau dingshawn lamang hta Mungmyit Sinli ginra na amyu baw sang shagu na ningbaw ningla ni, Jinghku rawt malan hpung na AA Rahkaing hte laga mung shawa marai 1000 jan sa du shang lawm wa ai hpe chye lu ai.
Munggu ginra gaw, ya ten, Miwa Kokang ni madung Uphkang ai ginra rai tim, maga mi de KIO Uphkang Sairu gran tawn ai ginra langai mung rai nga ai.
Munggu Ginwang gaw, KIA Dung 38 ginra rai nna, amyu baw sang hkum hkra nga ai ginra langai mung rai nga ai.
