Mali Nmai Zup Myihprap Wan madim galaw na matu, Mung Shawa ningmu jaw hkaw tsun hpawng lamang hpe, dai ni Myitkyina Dakkasu jawng kaw galaw wa ai lam chye lu ai.
Dai ni February 20 ya jahpawt Naypyidaw na Pyihtaungsu Hkringmang hte Hpaji Jaw Hpawmi Nbrang Doi Bu hte hkringmang daju Salang Hkyet Hting Nan ni woi awn nna, hkaw tsun hpawng lamang galaw wa ai hpe chye lu ai.
Dai Hkaw tsun hpawng lamang hta Mung shawa marai 1000 jan sa du shang lawm wa ai rai nna, Uphkang rung ni kaw na mung n ta langai n sa n mai hku atit anang hkan saw shaga wa ai lam chye lu ai.
Ndai laman Hkyet Htingnan shi nan woi awn nna, Mali Nmai Zup Madim masing hte seng na ading ding hkaw tsun hkawm taw ai hpe maram yu yang, Mali Hka Madim galaw na gaw teng sai masa lam re nga, ginra masha ni tsun da ai re.
“Wungyi Chuk Shi nan woi na Mung Shawa hkaw tsun hpawng ni grai galaw wa ai hpe yu yang, Mali Hka Madim galaw na teng sai ga rai nga ai,” dai galaw wa yang gaw Waimaw Kanpaiti lam kaba mayan hpyen masa laklai wa na re,” nga tsun maram da ai re.
Mali Nmai Zup Madim hpe galaw wa ai rai yang, Waimaw Kanpaiti lam kaba hta Hpyen masa laklai wa na lam nga ai nga, Mung masa yu maram ai ni tsun da ai re.
Mali Nmai Zup Madim masing lam the seng nna, lai wa sai Shata hta, Myitkyina Pang Mati Lisu htunghking wang hte Mungdaw Ginsup Pa ni hta mung galaw lai wa sai hpe chye lu ai.
Mali Nmai Zup Madim masing hpe Mung Shawa ni prat ban hte ban ning hkap wa ai rai tim, Myen Hpyen daru magam zing kau ai hpang, Miwa hte hkrum jahta nna, Mali Zup Myihprap wan Madim hpe galaw na matu hkyen shajin taw ai lam mung rai nga ai.
Ndai Madim hpe, n dai Asuya Nnan lung wa ai hpang, hkrang shapraw galaw sa wa na masa nga ai lam mung masa yu maram ai ni tsun da ai re.