Lapu Hka Ja Maw Kaw Hpyen Shada Ni Htep Taw Ai Majaw Majan Kalang bai Laja Wa Mai
Danai Lapu Hka hte Pat Maw shara ni hta, Majan Mahku nsen zim taw sai rai tim, Hpyen lahkawng shada lapran ni ni htep htep sin hkat taw ai majaw, Majan kalang bai byin wa na hpe myit tsang let, mung shawa ni galaw sha taw ai lam chye lu ai.
Lai wa sai December Shata hta, Pyithutsit dap ni nbungli shaga na, akajawng htim gasat shang wa nna, ahkyak ai Hkalawng kawng hpe wa gasat zing madu kau ai hpang, Lapu Hka Ja Maw ginra majan laja lana byin wa na, dai ginra na mung shawa yawng hprawng yen mat ai rai nga ai.
“Ya Majan gaw n byin sai, gara hku နားလည်မှု la da ai kun? Ni ni htep htep sha nga hkat taw ma ai, Majan bai byin wa na gaw aloi sha re, Mung Shawa ni mung Sha ra ai majaw gaw hkrit tim galaw ai ga rai nga ai,” nga tsun ai re.
Majan byin wa ai hpang, Mung Shawa yawng hprawng bra ayai mat ai hpang, Ya sinat mahku n sen zim ai Shata mi jan du wa ai hpang, Mung Shawa n kau Maw de shang na bai wa galaw sha taw sai rai nga ai.
Dai zawn bai wa galaw sha taw ai rai tim, Pyithutsit hte Shanglawt Hpyenla ni ni ni htep htep nga taw ai majaw, Majan kalang bai laja wa na hpe myit tsang let galaw sha taw ai lam, dai shara na lauban langai KNG de n dai zawn tsun ai re.
Danai Lapu Hka Ja Maw gaw, KIA Dung 14 uphkang tawn ai ginra rai nna, Myen hpyen dap ni lai wa sai December 13 ya shani a kajawng htim gasat shang wa ai rai nga ai.
Pyithutsit dap ni htim gasat shang wa ai hpang, Maw ginra na arung arai ni law malawng hpe Pyithutsit hte Kani ya ni pawng nna, hkan lagu htaw la ai lam ni galaw wa ai re.
Ya ten dai Ginra Mung Shawa ni galaw sha taw nga ai masa lam the seng nna, n tsa na salang wa n dai zawn matut tsun dan da ai re.
