Myen Hpyen dap ni dai hpawt manap, Sha It Yang (Lay Pyin) Bawm Yam Dap kaw na Tung Fung Mawdaw (4) Fourwheel Mawdaw (2) Yawng Pawng Mawdaw (6) hte Hpyen n gun jat wa ai nga, ginra masha ni tsun shana wa ai re.
Dai Myen Hpyen Hpung ni hpe ရေအေးချောင်း de wa htaw sa kau da ai rai nna, Dai Myen Hpyen Hpung ni lai wa ai ten, Balik ni lam lapran shim lam la ya ai nga ginra masha langai KNG de n dai zawn tsun dan wa ai re.
“Dai Hpawt Manap Lay Pyin Bawm Yam Dap kaw na Tung Fung Mawdaw (4) Fourwheel mawdaw (2) hta Hpyenla hpring hpring htaw nna, Seng Tawng Mare ding sa ရေအေးချောင်း maga de wa htaw sa kau da ai,” nga tsun dan ai re.
Myen Hpyen Mawdaw lai lung wa ai ten, Balik ni shim lam la ya nna, Mung Shawa ni n ra ai sha shinggan n pru hkawm na matu mare salang ni hpe tsun wa ai lam chye lu ai re.
Ya ten Myen Hpyen dap gaw, Mashi Kahtawng Kyuhpyi bum hpe htim gasat na matu, Kyuhpyi bum pawt na mung Shawa dum n ta hkan shara la nna, Mung Shawa ni gadai hpe mung n shang shangun hkum pat da ai re lam chye lu ai.
Myen Hpyen dap maga na gaw, Mashi Kahtawng Kyuhpyi bum hpe lu ngut ai hpang, Seng Tawng, Gwihka Mare ni hpe n lu yang lu hkra htim gasat wa na masa nga ai lam ginra masha ni tsun maram tawn ai re.
Mashi Kahtawng Kyuhpyi Bum Pawt mayan na mung shawa arung arai ni hpe wa shaw la na matu, Uru Sengmaw Ginwang Nawku Hpung magam gun ni, Hpakant Tatma kawng de lung nna, Myen Hpyen G2 hte wa hkrum jahta yu ai rai tim, Myen Hpyen dap maga, arung arai shaw na ahkang n jaw ai lam, n tsa na Salang wa ndai zawn matut tsun dan wa ai re.
“ Majan byin taw nga ai n chye i? nan hte si mayu ma ai i?” ngu Myen ga hku hkap ahkre na bai n htang kau shangun ai lam chye lu ai re.
Myen Hpyen dap ni gaw, ya ten, Mashi Kahtawng Kyuhpyi bum pawt may”an kaw dap jung shara jahkrat nga nna, Mung Shawa arung arai ni hpe hkrup mara kam ai hku, lagu shaw la taw nga ai lam chye lu ai re.
Ndai laman Myen Hpyen hpung ni Hpyen shamu shamawt, n-gun jat bang nga ding yang re majaw gaw, Majan matut laja wa na lam hpe mu lu taw ai nga, Mung Shawa ni tsun maram da ai re.
