Sinna Dingda Ginwang Ginajaw, Loi Yang Bum Ginwang Htai Ra Yang Mare kaw, Myen Hpyen Jet Nbungli bawm lahkawng wa jahkrat bun ai majaw, Mung Shawa marai 2 si nna, marai 5 Hkala hkrum wa ai lam chye lu ai.
February 18 Shana hkying 8:20 aten daram, Mandalay Tada Oo kaw na Pyen lung wa ai Jet Nbungli langai Htai Ra Yang Mare Daw Aye Mar Seng Dum N-ta kaw wa hkrat ang ai majaw, Mung Shawa marai 2 si nna, marai 5 hkala hkrum ai lam, dai ginra na mung shawa ni kaw na chye lu ai re.
“Dapba 8 Htai Ra Yang Mare Daw Aye Mar seng kaw nan wa hkrat ang ai majaw, dai kaw nga taw ai marai 2 si nna, marai 5 Hkala sawng ai ga rai nga ai,” nga tsun ai re.
Mung Shawa Si hkala wa ai sha n ga, dai Shara na dum n ta n kau mung wan hkru hten hkrum wa ai hpe chye lu ai.
Wan hkru hten mat ai hta dum n ta gade hkru lawm mat ai ngu hpe matut sagawn nga ding yang re.
Mana Nbungli bawm wa jahkrat ai shara gaw, Myen Uphkang Sairu hkrang hta, Shwegu Ginwang kata na Mare kahtawng langai rai nna, n dai laman dai ginra hta Hpa majan byin ai lam mung n nga ai rai tim, Myen Hpyen maga hpyen shamu shamawt lam ni loi li nga taw ai hpe chye lu ai.
February 17 ya shani Shwegu ginwang Ngabat Wa mare de Myen Hpyen N-gun 30 daram shang wa ai majaw, KIA PDF pawng hpawm dap maga hkap yu sin taw ai masa kaw ya na zawn n bungli bawm wa jahkrat bun wa ai masa mung re lam, ginra masha ni tsun maram da ai re.