Hpakant Tatma kawng na Myen Hpyen dap laknak kaba hkrup mara gap shadam bun ai majaw, Marau, Masa mare ni de wa hkrat ai lam ginra masha ni kaw na chye lu ai.
February 16 ya shani kaw na Majan grai wa htim gasat hkat ai lam n nga ai rai tim, Myen Hpyen dap maga, mana ting laknak kaba hkrup mara gap shadam bun wa ai lam hte seng nna, ginra masha Langai KNG Shiga de n dai zawn tsun dan wa ai re.
“Mani Shawng shani kaw na grai bai gap taw nga ma ai, Majan mung n byin re ai Marau Masa mare maga de wa hkrat kapaw ai, Mung Shawa Si hkala chyawm Hpa n ra ai,” nga tsun ai re.
February 17 ya shana hta mung, Hpakant Tatma kawng kaw na, shara shagu laknak kaba gap shadam bun ai rai nna, Mung Shawa hkra hkala ai lam hte seng nna dai ni ten du hkra hpa nga rai nna, shi ai lam chye lu ai.
Mana hkying 4 chyen aten daram hta Hpakant Tatma kawng na Myen Hpyenla, 4 Wheel Mawdaw 5 hte Mashi Kahtawng Kyuhpyi bum maga de sa htaw sa wa ai lam, Kai Chyan hte ni nawn ai ni kaw na chye lu ai.
Dai Hpyenla ni hpe sa htaw sa da ngut ai hpang, Laknak kaba hkrup mara gap shadam bun wa ai masa re lam ginra masha ni tsun maram da ai re.
Dai ni gaw, Hpakant kaw, Laknak n sen ngoi ai lam n nga ai zawn, Mung Shawa ni mung, ding yang hkawm sa taw nga ai lam chye lu ai re.
Mashi Kahtawng Kyuhpyi Bum marawn hta Myen HPyen dap hte KIA Pawng hpawm dap lapran n dai February Shata kaw na gap gasat hpang wa ai gaw, dai ni ten du hkra hpyen masa shaja hkat taw nga nna, Myen Hpyen dap the KIA ni Meter 300 ram sha tsan hkat sai lam chye lu ai.
Myen Hpyen hpung ni gaw, Kyuhpyi bum lung wa lam, Krung hkaraw kaw rawng nga nna, Kawng n tsa kaw gaw, KIA maga kring mading shara jahkrat nga taw ai majaw, dai kyuhpyi bum shara hpe Myen ni a loi sha n lu la na re nga, dai ginra na Hpyen masa yu maram nga ai ni tsun ai re.
Mashi Kahtawng Kyuhpyi Bum pawt mayan na mung shawa dum nta na arung arai ni hpe Myen Hpyen dap kam mara lagu la taw nga ai mung rai nga ai.
