Myen Hpyen Dap ningbaw Min Aung Hlaing Sagaing lahta daw, Hummalin Htamanthi (ထမံသီ) mare na Danai Hka Mahkrai hpaw poi kaw wa du shang lawm wa ai hpe chye lu ai.
Hummalin du ngut ai hpang, Naga ginra Lay Shi Lahe ginra ni de mung wa du gawan du kau da ai lam Myen Hpyen Shiga lawk ni hta mu lu wa ai re.
Wunpawng Mungdan Shanglawt Kongsi Ningbaw Malai (1) Dukaba Sumlut Gunmaw n dai Sagaing lahta daw gaw Jinghpaw mung a matu Hpyen masa lam hta ahkyak ai ginra ni re lam tsun pru wa ai hpang, Gumshem Myen Hpyen dap Ningbaw Shi nan dai ginra ni de wa du zinlum wa ai lam rai nga ai.
KIA gaw, ya ten dai ginra na laknak lang rawt malan hpung ni yawng hpe woi zinlum garum pawn ba taw ai majaw, Myen Hpyen dap maga, hkrit tsang wa na ya na zawn galaw ai re lam, Mung masa yu maram ai ni tsun tawn ai re.
Ya Min Aung Hlaing wa du ai ginra gaw, India Mungdan Kaba the ni ai Sagaing Naga ginra ni mung rai nga ai.
Myen Hpyen dap maga, KIO gaw, dai ginra de na laknak lang hpung yawng hte pri nem mahkri shawn mat na, India hte matut mat na hpe tsang dik re nga, Mung masa yu maram ai ni tsun madi madun da ai re.
Gumshem Myen Hpyen Dap Ningbaw Min Aung Hlaing wa gaw, Hummalin ထမံသီ mare na Danai Hka mahkrai hpaw poi hpe February 16 ya jahpawt galaw wa ai hpang, Naga Uphkang ginra de, bai matut lai lung wa nna, dai ginra na rawt jat galu kaba lam ni the seng nna, wa du matsun kau da ai lam, Myen Hpyen Shiga ni hta tsun da ai re.
